УЛУУСПУТ ОҤОРОН ТАҺААРААЧЧЫЛАРЫН ДЬААРБАҤКАТА - ДЬОКУУСКАЙГА

УЛУУСПУТ ОҤОРОН ТАҺААРААЧЧЫЛАРЫН ДЬААРБАҤКАТА - ДЬОКУУСКАЙГА

Балаҕан ыйын 13-14 күннэригэр, киин куораппыт Хомсомуоллар болуоссаттарыгар, улууспут оҥорон таһаарааччыларын атыы-эргиэн дьаарбаҥката үрдүк таһымнаахтык тэриллэн, ыалдьытынан толору ааста.

Икки күн устата биир дойдулаахтарбыт, куорат олохтоохторо уонна ыалдьыттара үрүҥ илгэттэн оҥоһуллубут эгэлгэ астары атыыластылар, амсайдылар, быыстапканы көрөн-истэн астыннылар.

Дьаарбаҥкаҕа сибиэһэй эт-үүт, минньигэс оҕуруот аһын, онтон да араас көрүҥ бородууксуйаны үгүөрү туруордулар: «Хоту» ТХПК, «Якутнацпродукт» ТХПК, Павловскайдааҕы үүт собуота, "Хорообут» ХЭТ, ИП Иванов Е.П., Игнатьева А.С., Борисова Е.А., Павлов А.Ю., Харитонова А.М., Ан А.С., Петров В.П., Свинобоева В.И., тарбахтарыгар талааннаах Надежда Сергеева салайааччылаах "Уран Майа" түмсүү, Анисия Федорова-Ааниисийэ, хомус ууһа Роман Иванов-Аар Аман Далан уус кэрэ оҥоһуктарын атыылаһа дьон тоҕуоруһа муһунна.

Маны таһынан, эстрада чаҕылхай сулустара, биир дойдулаахтарбыт Сахаайа, Александр Бурнашевтар, Инна Донская-Дайаана, Петр Кулаковскай, Аксиния Степанова, Роман Иванов, Арчылаана Лукачевская, Мария Иванова, Варвара Степанова, "Кыталык» үҥкүү норуодунай ансаамбыла кыттыылаах эҕэрдэ кэнсиэр, түмүккэ СӨ үтүөлээх этээччитэ Аксиния Степанова, СӨ Дархан этээччитэ Денис Оконешников оһуохайы оройуттан тутан дьон-сэргэ дуоһуйуутун ылла.

«Тумул» ТХПК бурдугуттан алаадьы, саламаат, бэйэ оҥорон таһаарааччыларбыт биэрбит бородууксуйаларыттан минньигэс астары мустубут дьон тутатына амсайдылар, сүргэлэрэ көтөҕүллэн тарҕастылар.

Бу тэрээһин улууспут үлэһит дьонун түмсүүтүн, сахалыы алаһа дьиэ сылааһын санатта, сыллата ыытыллар үтүө үгэскэ кубулуйда. Бары кыттыылаахтарга, тэрийээччилэргэ уонна кэлбит дьоҥҥо махталбытын тиэрдэбит!

Мэҥэ Хаҥалас улууһун дьаһалтатын пресс-сулууспата