БААТАРАҔА КҮӨХ ТӨЛӨН УОТА УМАЙДА

БААТАРАҔА КҮӨХ ТӨЛӨН УОТА УМАЙДА

Бүгүн, алтынньы 1 күнүгэр, Сахалартан бастакы Сэбиэскэй Сойуус Дьоруойа Федор Кузьмич Попов төрөөбүт дойдутугар Баатараҕа өр күүтүүлээх, дьоһуннаах түгэн үүннэ - гаас ситимэ тардыллыбытын бэлиэтиир күөх төлөн уота умайда!

Улууспут улахан суолталаах тэрээһинигэр Саха Өрөспүүбүлүкэтин Ил Дархана Айсен Сергеевич Николаев Арассыыйа Дьоруойдара Алексей Петровтуун, Филипп Евсеевтыын күндү ыалдьыт буоллулар. Ону таһынан «Сахатранснефтегаз» АУо генеральнай дириэктэрэ Алексей Колодезников, сүрүн инженерэ Александр Гоголев, СӨ бырамыысыланнаһын уонна геологиятын миниистирэ Максим Терещенко, норуот дьокутааттара Андрей Находкин, Олег Марков кыттыыны ыллылар.

Тэрээһин кэмигэр Дьоруой Федор Попов 82 сыл анараа өттүгэр хорсун быһыыны оҥорбут бэлиэ күнүнэн ытык пааматынньыгар сүгүрүйэн, өйдөбүл бэлиэтин - сибэкки дьөрбөтүн ууруута ураты түгэн буолла.

Ил Дархан Айсен Сергеевич Николаев уонна ыҥырыылаах ыалдьыттар элбэх оҕолоох Тарасовтар дьиэ кэргэҥҥэ ыалдьыттаатылар. Ыал ийэтэ Сардана Николаевна "Кэскил" оҕо уһуйааныгар оҕолору муусукаҕа дьарыктааччы, уопсастыбаннай саҕалааһынынан быйыл арыллыбыт моонньоҕон плантациятын салайааччыта буолар. Ыал аҕата Николай Николаевич "Алмазы Анабара" тэрилтэ силиэсэрэ. Тарасовтар дьиэ кэргэн гаас ситимигэр холбоммут үөрүүлэрин ирэ-хоро кэпсээн үллэһиннилэр.

Үөрүүлээх түгэнинэн улуус баһылыга Дмитрий Тихонов гаас ситимин тардыытыгар улахан кылааттарын киллэрбит дьоммутугар махтал суруктары туттарда: Мэҥэ Хаҥаластааҕы гааһы үллэрэр салалта суоппарыгар Андрей Скрябиҥҥа, силиэсэригэр Владимир Баишевка, маастардарга Михаил Мазиҥҥа, Дмитрий Захаровка итиэннэ силиэсэр-суоппарга Алексей Охлопковка.

Бу дьоһуннаах күн Мэҥэ Хаҥалас улууһун, Баатара нэһилиэгин олоҕор саҥа кэрдииһи арыйар. Гаас ситимэ – дьон олоҕун хаачыстыбатын тупсарар, үүнүүгэ-сайдыыга саҥа кыахтары биэрэр.

Мэҥэ Хаҥалас улууһун дьаһалтатын пресс-сулууспата