Бүгүн, алтынньы 23 күнүгэр, Майа сэлиэнньэтигэр Д

Бүгүн, алтынньы 23 күнүгэр, Майа сэлиэнньэтигэр Д.Ф. Ходулов аатынан норуот айымньытын дьиэтигэр анал байыаннай дьайыыга кытта сылдьар биир дойдулаахтарбытыгар анаан «Дойдум-тирэҕим» диэн быһа эпииргэ көмө-аахсыйа ыытылынна.

Бэлиэ күҥҥэ Мэҥэ Хаҥалас улууһун дьокутааттарын Сэбиэтин бэрэссэдээтэлэ Иннокентий Андросов, Майа сэлиэнньэтин баһылыгын бастакы солбуйааччы Дмитрий Игнатьев уонна улуус салалталарын салайааччылара аахсыйаҕа кыттыспыт дьоҥҥо-сэргэҕэ махтал тылларын эттилэр.

Тэрээһиҥҥэ уолаттарбыт дьиэ кэргэттэрэ, «Түмэн» уопсастыбаннай холбоһук, быыстапка туруораннар дьон-сэргэ сэҥээриитин ыллылар. Итиэннэ олохтоох аһы-үөлү атыылыыр дьаарбаҥкаҕа сэлиэнньэбит олохтоохторо мустаннар атыы-тутуу үллэҥнэс буолла. Өрөспүүбүлүкэтээҕи психологическай киин Мэҥэ Хаҥаластааҕы филиалын үлэһиттэрэ дьоҥҥо-сэргэҕэ түргэн-диагностика тиэһин оҥоттордулар,
В.А. Вонгородскай аатынан Дьокуускайдааҕы мэдэссиинэ колледжын Майатааҕы филиалын устудьуоннара кэлбит дьон туругун анал тэрилинэн бэрэбиэркэлээтилэр.
В.П. Ларионов аатынан Майа орто оскуолатын волонтерскай кылааһын оҕолоро «Саллаат суруга» аахсыйаны тэрийэн, олохтоохтор уолаттарбытыгар сурук суруйан ыыттылар.

Салгыы️️️
️️️

Сэлиэнньэбит тэрилтэлэрэ, уһуйааннар, оскуолалар, урбаанньыттар, олохтоохтор бары биир сомоҕо буолан туора турбакка бэйэлэрин кылааттарын киллэрдилэр. Киирбит үп анал байыаннай дьайыыга кытта сылдьар биир дойдулаахтарбытыгар көмө быһыытынан барыаҕа. Нэдиэлэ устата улуус тэрилтэлэрэ кэлэннэр араас наадалаах маллары хомуйан туттарбыттара, ону барытын улуустааҕы биир кэлим дьуһуурунай-диспетчерскэй сулууспа салайааччыта Афанасий Максимов көмөнү илдьэр бөлөҕү кытта уолаттарбытыгар тиксэриэхтэрэ.

Аахсыйаҕа кэлэн кыттыбыт улууспут дьонугар-сэргэтигэр Майа олохтоох дьаһалтатын аатыттан барҕа махталбытын биллэрэбит. Хоһуун уолаттарбытыгар күүспүт-көмөбүт этэҥҥэ, түргэнник айаннаан тиийиэ диэн эрэнэбит.

Майа олохтоох дьаһалтата