67-с В.К. Степанов аатынан Култуура уонна спорт эстэпиэтэтэ түмүктэннэ

Кулун тутар 21 күнүгэр Д.Ф.Ходулов аатынан култуура киинигэр улууспут дьонун-сэргэтин үгүс сыл тухары сомоҕолуур, биир санаалыыр, 67-с төгүлүн ыытыллар Василий Константинович Степанов аатынан Култуура уонна спорт эстэпиэтэтин кыайыылаахтарын наҕараадалыыр уонна бастыҥнары түмэр түһүлгэ тэрилиннэ.

Быйылгы эстэпиэтэ Арассыыйаҕа Дьиэ кэргэн, өрөспүүбүлүкэбитигэр Оҕо саас, улууспутугар Тыа хаһаайыстыбатын сылларыгар, үөрэҕэрии эйэгэтэ тэриллибитэ 150 сылыгар туһуланан Бигэ туруктаах дьиэ кэргэн дойду бөҕө тирэҕэ диэн девизтээх киэҥ далааһыннаахтык ыытыллан түмүктэннэ.

Эстэпиэтэ саха омук музыкальнай инструменнарын сөргүтээччи, Кыталык норуодунай үҥкүү ансаамбылбыт сүбэһитэ, аар саарга аатырбыт Оһуор үҥкүүтүн үрдүк мэҥэ халлааҥҥа көтүппүт, РФ, СӨ култуураларын үтүөлээх үлэһитэ, култуура, ускуустуба биллиилээх диэйэтэлэ, драматург, суруйааччы, худуоһунньук, үҥкүү туруорааччы, бөдөҥ этнограф - Иоаким Дмитриевич Избеков Уустаах Избеков төрөөбүтэ 115, ону тэҥэ XXс үйэ бастыҥ ырыа айааччыта, кэрэ куоластаах ырыаһыт, айылҕаттан айдарыылаах мелодист Валерий Власьевич Ноев төрөөбүтэ 85 сылларыгар анаммыт фестиваль буолла.

Онон сүрүн ирдэбиллэринэн эстэпиэтэ кыттыылаахтара оһуор үҥкүүтүн толоруулара уонна Валерий Ноев айбыт ырыаларын толоруу киирбитэ. Оһуохайы 3 көлүөнэ (оскуола оҕото, ыччат, 35 саастан үөһээ) дьоммут таһаарбыттарын көрдүбүт-иһиттибит. Мантан биир Мэҥэлии оһуокайы таһаарыы ирдэнэр этэ.

Быйыл быыстапкаҕа ирдэбилгэ барыта уонтан тахса көрүҥ балаһыанньаҕа ыйыллыбыт хайысхаларынан киирбитэ. Саха төрүт дьарыктарын, төрүт үгэстэрин сайыннарыы, тарҕатыы үлэтэ салҕыы ыытылларын ситиһэр сыалтан.

Спортка күөн-көрсүһүү 10 көрүҥүнэн буолла.

Уопсай түмүк култуура уонна спорт хайысхаларынан учуоттанан миэстэлэр быһаарылыннылар.

Тыҥааһыннаах киирсиилэр түмүктэринэн кыайыылаахтар биллэн, үөрүүлээх быһыыга-майгыга, дьон-норуот иннигэр наҕараадаларын, улуус дьаһалтатын грамоталарын, дипломнарын, анал кубоктары уонна харчынан бириэмийэни улууспут баһылыга Дмитрий Иванович Тихонов туттарда.

Бастакы бөлөххө: I миэстэ Төҥүлү

II миэстэ Хара

III миэстэ Аллараа Бэстээх

Иккис бөлөххө: I миэстэ Нуораҕана

II миэстэ Чүүйэ

III миэстэ Тиэлиги

Үһүс бөлөххө: I миэстэ Ороссолуода

II миэстэ Томтор

III миэстэ Матта

Түмүккэ кыайыылаахтары эҕэрдэлээн туран 68с В.К.Степанов аатынан Култуура уонна спорт эстэпиэтэтэ саха норуотун легендарнай дьоруойа Манчаары Баһылай төрөөбүтэ 220 өрөгөйдөөх сылыгар ананыа диэн биллэрэбит.