А.А. ПАХОМОВ ААТЫНАН ТИЭЛИГИ ОРТО ОСКУОЛАТА 115 СЫЛЫН БЭЛИЭТЭЭТЭ

А.А. ПАХОМОВ ААТЫНАН ТИЭЛИГИ ОРТО ОСКУОЛАТА 115 СЫЛЫН БЭЛИЭТЭЭТЭ

 

Бүгүн Александр Алексеевич Пахомов аатынан үтүөҕэ-үөрэххэ, билиигэ-көрүүгэ угуйар улууспут биир бастыҥ үлэлээх, сахалыы тыыннаах үөрэҕин кыһата, Тиэлиги орто оскуолата төрүттэммитэ үбүлүөйдээх 115 сылын бэлиэтээтэ.

 

Күн бүгүн Василий Бурнашев салайааччылаах үгүс көлүөнэ ыччаты иитэн-үөрэтэн, олох киэҥ аартыгар атаарбыт оскуола кэлэктиибигэр 65 үөрэнээччи билиини сомсор, уопсайа 43 үлэһит, 26 учуутал күннэтэ кэнчээри ыччат чиҥ билиилээх, киэҥ көрүүлээх,  төрөөбүт дойдутун таптыыр, харыстыыр буола үүнэригэр айымньылаахтык үлэлии-хамсыы сылдьаллар.

 

Дьоро күн бастакы чааһыгар оскуола устун экскурсия, “Ойор күннээх оҕо сааспыт биһигэ оскуолабыт биһиэнэ”, “Тапталлаах оскуолам 115 сааһа”, “Ис сүрэхтэн”, “Алтан чуораан алгыһынан”, “Үөрэх баар-бараммат баай”, “Үөрэммит, үлэлээбит оскуолабытыттан кынат анньынан” диэн ыҥырыылаах ыалдьыттар кыттыылаах оскуоланы араас сылларга бүтэрбит выпускниктарга кылаас чаастара ыытылыннылар.

Бэлиэ түгэнинэн нэһилиэккэ оскуола устуоруйатын кэрэһэлиир түмэл-кылааска Тиэлиги орто оскуолатыгар 29 сыл устата таһаарыылаахтык үлэлээбит РСФСР норуотун үөрэҕириитин туйгуна, СӨ үөрэҕириитин туйгуна, педагогическай үлэ бэтэрээнэ Галина Степановна Свинобоева аатын иҥэрии буолла.

 

Тэрээһин үөрүүлээх чааһыгар Ил Түмэҥҥэ улууспут дьокутаата Андрей Находкин, “Саха сирин кэнчээри ыччата” өрөспүүбүлүкэтээҕи тирэх киин салайааччытын бастакы солбуйааччы Александр Брызгалов, улуус дьаһалтатын үлэтин тэрийэр уонна кадрдары салайар салаа начаалынньыга Станислав Захаров, нэһилиэк баһылыга Иннокентий Исаков, экономическай наука доктора, СӨ норуотун хаһаайыстыбатын үтүөлээх үлэһитэ, меценат Александр Пахомов, СӨ үөрэҕириитин үтүөлээх үлэһитэ Егор Неустроев, саха төрүт итэҕэлин сөргүтээччи Дмитрий Федотов, экономическай наука доктора, “Арассыыйа-мин историям” мультимедийнай устуоруйа пааркатын дириэктэрэ Дмитрий Соловьев, оскуола дириэктэрэ Василий Бурнашев мустубут бар дьону, педагогическай үлэ бэтэрээннэрин, кэлэктииби, үөрэнээччилэри бүгүҥҥү үөрүүлээх күнүнэн эҕэрдэлээн туран наҕараадалары, эҕэрдэ суруктары туттардылар.

 

Оскуола кэлэктиибин үбүлүөйдээх күҥҥүтүнэн эҕэрдэлээн туран түбүктээх үлэҕит үтүө түмүктээх буоллун, үрдүк билиини иҥэрэн, үгүһү-элбэҕи ситиһиҥ диэн баҕа санаабыт бастыҥын аныыбыт.

 

Мэҥэ Хаҥалас улууһун дьаһалтатын пресс-сулууспата