ААЛЛАРАА БЭСТЭЭХ М.Е.ПОПОВ ААТЫНАН ОСКУОЛАТА 80 СЫЛЫН БЭЛИЭТЭЭТЭ

ААЛЛАРАА БЭСТЭЭХ М.Е.ПОПОВ ААТЫНАН ОСКУОЛАТА 80 СЫЛЫН БЭЛИЭТЭЭТЭ

Ахсынньы 9 күнүгэр Михаил Егорович Попов аатынан улууспут биир баай историялаах Аллараа Бэстээх орто оскуолата төрүттэммитэ 80 сылын бэлиэтээтэ.

Бу күн Михаил Егорович төрөппүт кыыһа Валентина Михайловна Константинова - Попова Арассыыйа үтүөлээх бырааһа оскуолаҕа ыалдьыттаата.

Выпускниктарга аналлаах кылаас чаастара, экскурсия, оскуола дьаарбаҥката тэриллэн ыытылынна.

Тэрээһин үөрүүлээх чааһыгар

улуустааҕы үөрэҕирии салалтатын начаалынньыга Гаврил Толстяков, улуус дьаһалтатын үлэтин тэрийэр уонна үлэһиттэрин салайар салаа салайааччыта Станислав Захаров мустубут бар дьону, педагогическай үлэ бэтэрээннэрин, кэлэктииби, үөрэнээччилэри эҕэрдэлээтилэр, наҕараадалары, эҕэрдэ суруктары туттардылар.

Аллараа Бэстээх бөһүөлэгэр бастакы үөрэх кыһата 1943 сылтан, Аҕа дойду сэриитин үгэнин саҕана тэриллэн, үтүмэн элбэх уларыйыылары уҥуордаан, балтараа тыһыынча кэриҥэ ыччаты үөрэхтээн билигин улууспут биир тутаах, улахан оскуолата буолар.

Күн бүгүн оскуола салалтатыгар дириэктэринэн Стручков Филипп Александрович, үөрэх чааһыгар дириэктэри солбуйааччынан Прибылых Гея Михайловна, методическай чааһыгар Варфоломеева Алена Артуровна, иитии чааһыгар Попова Айна Кимовна, хаһаайыстыба чааһыгар Атласов Иннокентий Иннокентьевич, ону таһынан биир идэлээхтэр сойуустарын бэрэссэдээтэлинэн Лопсонова Любовь Баяндуевна биир санаанан, уопсай сүбэнэн, туруоруммут сыалы-соруктары ситиһэргэ дириҥ ис хоһоонноох үлэни тэрийэн ыыталлар.

Кэнники сылларга оскуолаҕа үөрэнэр оҕо ахсаана элбээн иһэр, ол курдук 2023-2024 үбүлүөйдээх үөрэх сылыгар оскуолаҕа 12 араас омук оҕолоро түмсэн 704 үөрэнээччилээхтэр. Оҕо ахсаана элбээһинэ улууспут киинин сайдыытын кытта ыкса ситимнээҕэ саарбаҕа суох.

Оскуолаҕа күннэтэ учууталлар идэлээх таһымнарын үрдэтиигэ, үөрэнээччилэр бары өттүнэн үүнэн-сайдан тахсалларыгар ситимнээх үлэ тиһигэ быһыллыбакка ыытыллар.

Ол курдук, оскуола иһинэн онус сылын “Окрыленные мечтой” оҕо хамсааһына ситиһиилээхтик үлэлиир. Бу хамсааһын оҕо бары өттүнэн талаанын арыйарыгар, туруоруммут сыалын-соругун ситиһэргэ бэлэм буоларыгар төһүү күүс, олук буолар сыаллаах.

Ону таһынан, быйылгы үөрэх дьылыттан, оҕону кыра сааһыттан инники идэтигэр бэлэмниир сыаллаах педагогика, медицина уонна тимир суол кылаастарын арыйан, үлэлэтэн саҕалаабыттар.

Бэһис кылаас оҕолорун, ыксалаах быһыыга бэлэм буола үөрэнэллэрин ситиһэргэ МЧС кылааһын арыйбыттар.

Мэҥэ Хаҥалас улууһун дьаһалтатын пресс-сулууспата