АЛЛАРАА БЭСТЭЭХХЭ - СҮРЭХТЭН СҮРЭХХЭ БЫРАЙЫАК

АЛЛАРАА БЭСТЭЭХХЭ - «СҮРЭХТЭН СҮРЭХХЭ» БЫРАЙЫАК

 

Бүгүн, алтынньы 22 күнүгэр, Улуу Кыайыы 80 сылын көрсө ыытыллар “Сүрэхтэн сүрэххэ” бырайыак чэрчитинэн Аллараа Бэстээх бөһүөлэгэр Култуура киинигэр Нөөрүктээйи, Хаптаҕай, Ороссолуода, Дьаҥхаады уонна 3-с Мэлдьэхси нэһилиэктэриттэн аҕам саастаах дьоммут түмүстүлэр.

 

Аллараа Бэстээх бөһүөлэгэр күн бүгүн 2 сэрии огдообото, 3 тыыл бэтэрээнэ уонна 47 сэрии сылын оҕолоро олороллор. Улуу Өлүөнэ өрүс биэрэгэр турар Аллараа Бэстээх сириттэн илин эҥэр хорсун-хоодуот буойуннара Аҕа дойду Улуу сэриитигэр эйэлээх, сырдык олох иһин, дойдубут инники кэскилин туһугар ыҥырыллан барбыттара.

 

Улуустааҕы Олоҥхо дьиэтин фольклорга исписэлииһэ, СӨ култууратын туйгуна Аксиния Степанова тэрээһини тойугунан уонна Аллараа Бэстээх 2 №-дээх орто оскуолатын Анна Гоголева салайааччылаах үөрэнээччилэр бөлөхтөрө “Былыр, быйыл” дьүһүйүүнэн арыйдылар.

 

Тэрээһин үөрүүлээх чааһыгар улуус баһылыгын социальнай уонна имиджевэй бэлиитикэҕэ солбуйааччы Альбина Григорьева, нэһилиэнньэ социальнай көмүскэллээх буолуутун биир кэлим киинин салайааччыта Иван Шестаков, улуус бэтэрээннэрин Сүбэтин бэрэссэдээтэлэ Евдокия Решетникова, улуустааҕы Ытык сүбэ салайааччыта Зиновий Игнатьев, Аллараа Бэстээх бөһүөлэгин бэтэрээннэрин бэрэссэдээтэлэ Айталина Агаркова аҕам саастаах дьоммутун бүгүҥҥү үөрүүлээх күнүнэн истиҥ-иһирэх эҕэрдэ тылларын анаатылар, ситиһиилээх күнү баҕардылар.

 

Аллараа Бэстээх бэтэрээннэрин Сүбэтин өр кэмнэргэ салайбыт, уопсастыбаннай үлэтин, дьон-сэргэ туһугар кыһамньытын иһин махтанан туран Петр Петрович Винокуровка улуус социальнай-экономическай сайдыытыгар кылаатын иһин түөскэ кэтиллэр бэлиэни кытта дастабырыанньаны улуус баһылыга Дмитрий Тихонов аатыттан баһылыгы социальнай уонна имиджевэй бэлиитикэҕэ солбуйааччы Альбина Григорьева туттарда.  

 

Бу күн доруобуйаҕа туһалаах уонна дьоҕуру сайыннарар маастар-кылаастар, “Тыыл бэтэрээнигэр бэлэх” автодесант, мустубут эр дьоҥҥо бэйэлэрин көрүүлэрин, санааларын тула кэпсэтиилэр, сэрии сылын оҕолорун кэпсээннэрин үйэтитэн хаалларар сыаллаах видеоҕа устуу, психологическай тренинг, үтүө дьыаланы оҥорор “Манчаары ыччаттара” этэрээт тимуровскай көмө, Майатааҕы үһүс көлүөнэ оскуолата эҕэрдэ кэнсиэр бэлэх ууннулар.

 

Бу күн аҕам саастаах дьоммут сылаас чэйдээх сандалы остуол тула олорон ирэ-хоро кэпсэтэн, санааларын атастаһан, дьоҕурдарын сайыннаран, сэргэхсийэн, күннэрин туһалаахтык атаардылар.

 

Мэҥэ Хаҥалас улууһун дьаһалтатын пресс-сулууспата