Алтан нэһилиэгэ иннин диэки эрчимнээхтик хардыылыыр.

Алтан нэһилиэгэ иннин диэки эрчимнээхтик хардыылыыр.

Саҥа социальнай эбийиэктэр тутуллаллар, нэһилиэк тас көстүүтүгэр болҕомто ууруллар, гаас ситимэ кэллэ.

Ол туһунан Алтан нэһилиэгин баһылыга Николай Матчитов үллэстэр:

- Нэһилиэнньэбит ахсаана 476 киһи. Оскуолабытыгар 50 оҕо үөрэнэр. Икки бааһынай хаһаайыстыбалаахпыт, онтон атыттара чааһынайдар. Сүөһүбүт 655, сылгыбыт 416. Быйыл өҥ дьыл туран дьоммут-сэргэбит көтөҕүллэн туран оттоотулар.

Бэйэ көҕүлээһин чэрчитинэн быйылгы куонкуруһу ааһаммыт ыһыахтыыр түһүлгэбитин сөргүтэн, саҥалыы оҥоро сылдьабыт.

Өлөчөй уонна Бүтэйдээх икки ардынан гаас утаҕа тардылынна. Эһиил барыта этэҥҥэ буоллаҕына нэһилиэкпитигэр күүтүүлээх күөх төлөн киириэхтээх.

Доруобуйа харыстабылын министиэристибэтин хайысхатынан – нэһилиэкпитигэр саҥа ФАП (фельдшерскай акушерскай пуун) тутулла турар. Билиҥҥитэ миэдиктэрбит урукку дьиэлэригэр бааллар. Штакка – биэлсэр, акушер уонна санитар үлэлии сылдьаллар.

Өрөспүүбүлүкэтээҕи үтүө дьыала чэрчитинэн улахан тэрилтэ дьиэтин уораҕайа тутулла турар. Манна дьаһалта, кулууп уонна библиотека олохтонуохтара. Бүтэр түһүмэҕэр чугаһаан, кэлэр сылларга үлэҕэ киирэрин эрэнэ күүтэбит.

«Үтүө санаалаах үөрэхтээһин» бырагыраамаҕа коррекционнай оскуолабыт бырайыак көмүскээн 7 мөлүйүөннээх үбүлээһини кыайаннар, саҥа кылаастар кэллилэр, оборудованиеларын туруоруохтаахтар.

ОДЬКХ өттүнэн ититии трассата олохтоохтук оҥоһулунна.

Мэҥэ Хаҥалас улууһун дьаһалтатын пресс-сулууспата