АЛТАН НЭҺИЛИЭГЭР ЭЛБЭХ ХАЙЫСХАЛААХ КУЛТУУРА КИИНИН ДЬИЭТЭ АРЫЛЫННА

АЛТАН НЭҺИЛИЭГЭР ЭЛБЭХ ХАЙЫСХАЛААХ КУЛТУУРА КИИНИН ДЬИЭТЭ АРЫЛЫННА

 

Бүгүн, сэтинньи 29 күнүгэр, Алтан нэһилиэгэр “Мин Сахам сирэ XXI үйэҕэ” өрөспүүбүлүкэтээҕи үтүө дьыала хамсааһын бырагырааматын нөҥүө тутуллубут элбэх хайысхалаах култуура киинин дьиэтэ арыллар дьоро күнэ үүннэ.

 

Бэлиэ күн баараҕай тутуу үгүс сылларга бар дьону түмэ тардар, сомоҕолуур тыыннаах буоллун диэн үгэс быһыытынан аал уокка айах тутан, алгыс туомун толорууттан саҕаланна.

 

Эбийиэги олоххо киллэрбит «Стройкомплектсервис» бэдэрээччигэ Руслан Трофимов Алтан нэһилиэгин баһылыга Николай Матчитовка ыраахтан-чугастан кэлбит ыҥырыылаах ыалдьыттар, нэһилиэк олохтоохторо, кэлэктиип ытыстарын тыаһыгар бэлиэ күлүүһү туттарда.

 

Үөрүүлээх күн долгутуулаах түгэнигэр улуус баһылыга Дмитрий Тихонов, “Мин Сахам сирэ XXI үйэҕэ” өрөспүүбүлүкэтээҕи үтүө дьыала хамсааһын салайааччыта Алексей Петров, «Стройкомплектсервис» бэдэрээччигэ Руслан Трофимов уонна култуура киинин дириэктэрэ Поликарп Билюкин аалай лиэнтэни быһан саҥа кулууп дьиэтин аанын тэлэччи арыйдылар. Мустубут бар дьону саха дьонун сиэринэн арыылаах алаадьынан, уохтаах кымыһынан күндүлээтилэр.

Тэрээһин үөрүүлээх чааһыгар улуус баһылыга Дмитрий Тихонов, “Мин Сахам сирэ XXI үйэҕэ” өрөспүүбүлүкэтээҕи үтүө дьыала хамсааһын салайааччыта Алексей Петров, СӨ Ил Түмэн Судаарыстыбаннай Мунньаҕын маассабай иһитиннэрии ньымаларын уонна култуура кэмитиэтин бэрэссэдээтэлэ  Виктор Губарев, тутууга, дьиэ-уот коммунальнай хаһаайыстыбатыгар уонна энэргиэтикэҕэ сис кэмитиэтин бэрэссэдээтэлэ Александр Корякин, айылҕа баайыгар уонна экологияҕа сис кэмитиэтин бэрэссэдээтэлэ Андрей Находкин, СӨ тутууга миниистирин бастакы солбуйааччы Евгений Афанасьев, СӨ култуура уонна духуобунай сайдыыга министиэристибэтин муниципальнай тэриллиилэрин кытта уонна социокультурнай үлэҕэ салаатын салайааччыта Вера Моисеева, улуустааҕы култуура салалтатын салайааччыта Анна Исакова, Алтан нэһилиэгин баһылыга Николай Матчитов эҕэрдэ тыллары эттилэр, СӨ, Мэҥэ Хаҥалас улууһугар социальнай-экономическай, тутуу, култуура сайдыытыгар улахан өҥөлөөх, өр сылларга үтүө суобастаахтык үлэлээбит, саҥа эбийиэк киириитигэр кылааттарын киллэрбит бар дьоҥҥо махтанан туран наҕараадалары, бэлэхтэри туттардылар.

Тэрээһин чэрчитинэн улууспутугар үтүө дьыала хамсааһын бырагырааматын нөҥүө тутуллубут эбийиэктэр хаартысканан быыстапката туран мустубут дьон-сэргэ үөрэ, махтана көрдө.

 

Санатан эттэххэ, "Мин Сахам сирэ XXI үйэҕэ” өрөспүүбүлүкэтээҕи үтүө дьыала хамсааһын быйыл 25 сыллаах үбүлүөйэ буолар. Биһиги улууспутуттан саҕаламмыт «Үтүө дьыала» хамсааһын көмөтүнэн күн бүгүн өрөспүүбүлүкэ араас муннугар эбийиэктэр тутуллан дьон-сэргэ махтала үгүс.

 

Күндү Алтан нэһилиэгин олохтоохторун, араас сылларга үлэлээбит бэтэрээннэри, култуура киинин кэлэктиибин бүгүҥҥү үөрүүлээх күҥҥэ үлэҕитигэр ситиһиини, кэрэни кэрэхсэтэ, саҥаны арыйа, дьон-сэргэ махталын ыла тураргытыгар баҕарабыт. Саҥа эбийиэк бар дьон үөрүүтүн үксэтэ, айар талааннарын, ураты дьоҕурдарын сайыннара туруо диэн эрэнэбит.

 

Мэҥэ Хаҥалас улууһун дьаһалтатын пресс-сулууспата