БАҺЫЛЫК ОТЧУОТА ДОЙДУ НЭҺИЛИЭГИТТЭН САҔАЛАННА

БАҺЫЛЫК ОТЧУОТА ДОЙДУ НЭҺИЛИЭГИТТЭН САҔАЛАННА

Бүгүн, тохсунньу 20 күнүгэр, Мэҥэ Хаҥалас улууһун баһылыгын 2023 сыллааҕы үлэтин нэһилиэнньэ иннигэр отчуота саҕаланна.

Улууспут баһылыга Дмитрий Тихонов салайар, управлениелар, тэрилтэлэр салайааччылара, бэрэстэбиитэллэрэ кыттыылаах бөлөҕө Дойду нэһилиэгиттэн үлэтин саҕалаата.

Отчуоту барыта 30 олохтоох кэлэн иһиттэ. Киирии тылы нэһилиэк баһылыга Олег Кычкин этэн туран, дьонун-сэргэтин иилээн-саҕалаан көҕүлээтэ.

Ааспыт сыл устата улууспутугар ыытыллыбыт үлэ түмүктэрин сүрүннэрин баһылык Дмитрий Тихонов билиһиннэрдэ. Улууспутуттан Ил Түмэн дьокутаата Андрей Находкин, Бороҕоннооҕу уокуруктан Ил Түмэн дьокутаата Геннадий Васильев, улуус дьокутааттарын Сэбиэтин бэрэссэдээтэлэ Иннокентий Андросов тыл эттилэр.

Олохтоохтор аһаҕас кэпсэтиигэ интэриэһиргиир ыйытыктарын биэрдилэр. Ол курдук:

- култуура уонна спорт эстэпиэтэтин балаһыанньатын тула, кулуупка хореограф суоҕунан сэминээри ыытары,

- хаһаайыстыбалаах дьон оттуур сирдэрин кэҥэтиигэ туох ирдэбиллэр баалларын,

- тыа хаһаайыстыбатынан дьарыктаныан баҕалаах дьоҥҥо "Агростартап" көмөтүн,

- ынахха көрүллэр субсидия туһунан ыйытыктар буоллулар.

Нэһилиэк олохтоохторуттан киирбит туруорсуулар:

- быйылгы дьылга холбонуохтаах хочуолунай ититии систиэмэтигэр социальнай эбийиэктэри таһынан чааһынай дьиэлэри холботторуу,

- нэһилиэккэ землеустроитель көрүллэрэ,

- түргэн интернет ситимин тардыы,

- сүөһү хаанын тупсарыыга нэһилиэккэ тастан оҕуһу аҕалтарыы.

Нэһилиэк дьоно-сэргэтэ этиилэрин, туруорсууларын этэн туран, улуус салалтатын отчуоттуур бөлөҕөр ситиһиилэри баҕардылар.

Мэҥэ Хаҥалас улууһун дьаһалтатын пресс-сулууспата