Балаҕан ыйын 8 күнүгэр ыытыллыбыт улуустааҕы күһүҥҥү быыстапка-дьаарбаҥка чэрчитинэн дэлэй үүнүүлээх.

Балаҕан ыйын 8 күнүгэр ыытыллыбыт улуустааҕы күһүҥҥү быыстапка-дьаарбаҥка чэрчитинэн дэлэй үүнүүлээх, кэрэ көстүүлээх бастыҥ тиэргэни быһаарар «Быйаҥнаах тэлгэһэ» күөн күрэс кыайыылаахтарыгар ыалдьыттаатыбыт.

Марфа, Руслан Сидоровтар Төҥүлү нэһилиэгин үлэни өрө туппут саха сайдам ыаллара буолаллар.

Дьиэ кэргэҥҥэ бэйэ бэйэҕэ көмөлөһөр сиэри олохтоон, биир санаанан салайтаран, оҕолорун туох интэриэстээхтэринэн таба көрөн сайыннарар усулуобуйа тэрийэргэ болҕомтолорун уураллар.

 

1994 сыллаахха эйэлэрин холбоон, алаһа дьиэни тэринэн ыал буолан икки уол, үс кыыс оҕоҕо күн сирин көрдөрбүттэр.

Кыра уоллара 11 кылаас, улахаттар номнуо атахтарыгар туран үлэ-хамнас дьоно айа-тута сылдьаллар. Билигин биир күндү сиэн эбэтэ, эһэтэ буолан, кэтэх хаһаайыстыба тэринэн, ынах-сүөһү ииттинэн, нэһилиэктэрин олоҕор көхтөөх кыттыыны ылан, айымньылаахтык үлэлээн-хамсаан олороллор.

 

Ыал аҕата Руслан Афанасьевич Нам Көбөкөнүттэн төрүттээх, «Олимпионик» уһуйааҥҥа харабылынан үлэлиир. Иллэн кэмигэр уһанар, бултуур-алтыыр, «Ситим» үҥкүү ансаамбылын кыттааччыта.

Ыал ийэтэ Марфа Ивановна Төҥүлү төрүт олохтооҕо, «Олимпионик» уһуйааҥҥа 30 сыл иитээччинэн таһаарыылаахтык үлэлии сылдьар. Нэһилиэк «Айар кут» түмсүү, улуустааҕы «Таммахтар» литературнай кулууп чилиэнэ, түөлбэ салайааччыта.

 

Сидоровтар дьиэ кэргэнинээн олохтообут икки бырайыактарынан дьон-сэргэ сэҥээриитин, махтабылын ылбыттар. Ол курдук:

кыһыҥҥы өттүгэр тэлгэһэлэригэр хаар, муус оҥоһуктары оҥорон нэһилиэктэрин дьонун үөрдэллэр,

сайыҥҥы өттүгэр үс сыл субуруччу алын кылаас оҕолоругар үөрэхтэрин чиҥэтэр, интэриэһинэй дьону кытта көрсүһүннэрэр, экскурсиялардаах лааҕыр тэрийэн үлэлэппиттэр.

Бу бырайыактарынан өрөспүүбүлүкэтээҕи күрэхтэргэ нэһилиэктэрин, улуустарын аатын үгүстүк чиэстээхтик көмүскээн ааттаппыттар.

 

Бу курдук Сидоровтар дьиэ кэргэн бэйэ бэйэҕэ, дьоҥҥо-сэргэҕэ, төрөөбүт дойдуга, үлэҕэ муҥура суох тапталы, бэриниилээх сыһыаны, күүстээх итэҕэли өрө тутан, сахалыы сиэри-туому, төрүт үгэһи тутуһан, киһи эрэ холобур оҥостуох бигэ тирэхтээх саха сайдам ыала буолан нус-бааччы олороллор.

 

Мэҥэ Хаҥалас улууһун дьаһалтатын пресс-сулууспата