БЭЙЭНИ САЛАЙЫНЫЫ МУННЬАҔАР ОТ БЫЛААНЫН БОППУРУОҺА ТУРДА

БЭЙЭНИ САЛАЙЫНЫЫ МУННЬАҔАР ОТ БЫЛААНЫН БОППУРУОҺА ТУРДА

Бүгүн, от ыйын 16 күнүгэр, улуус дьаһалтатыгар бэйэни салайыныы боппуруостарынан окко киирии, былаан туолуутун тула мунньах ыытылынна.

Кэпсэтиини улуус баһылыга Дмитрий Тихонов иилээн-саҕалаан ыытта.

Оройуон дьокутааттарын Сэбиэтин бэрэссэдээтэлэ Иннокентий Андросов, нэһилиэктэр баһылыктара, тустаах салалталар салайааччылара, тыа хаһаайыстыбатын тэрилтэлэрин салайааччылара кыттыыны ыллылар.

Улуустааҕы тыа хаһаайыстыбатын салалтатын салайааччыта Иннокентий Семенов быйылгы дьылга 41 927 туонна оту оттуур, 2 100 туонна сиилэһи уонна 100 туонна сенаһы бэлэмниир былааннаахпыт диэн билиһиннэрдэ.

Дьабыыл нэһилиэгин баһылыга Дмитрий Петров, Дьаҥхаады баһылыга Василий Стручков, Чыамайыкы баһылыга Александр Захаров нэһилиэктэригэр окко киирии туругун иһитиннэрдилэр.

Архитектура салалтатын начаалынньыга Вячеслав Егоров 500-кэ диэри киһилээх нэһилиэктэр икки ардыларыгар табыгастаах эйгэни тэрийиигэ, тупсарыы эбийиэктэрин олоххо киллэриигэ, пааматынньыктары сөргүтүүгэ биллэриллэр куонкурус ис туругун кэпсээтэ. Куонкурус кыайыылааҕар 500 тыһыынча солкуобай бириистэнэр.

Улуус баһылыга Дмитрий Тихонов үөрүүлээх быһыыга Араҥас, Баатара, 1-кы Наахара, Хорообут нэһилиэктэригэр официальнай гербэлэрэ РФ Президенин иһинэн үлэлиир Геральдическэй сэбиэтинэн бигэргэтиллибиттэрин туһунан туоһуларын туттарда.

Мэҥэ Хаҥалас улууһун дьаһалтатын пресс-сулууспата