БЭЙЭНИ САЛАЙЫНЫЫ СЭБИЭТИН УОЧАРАТТААХ МУННЬАҔА ЫЫТЫЛЫННА

БЭЙЭНИ САЛАЙЫНЫЫ СЭБИЭТИН УОЧАРАТТААХ МУННЬАҔА ЫЫТЫЛЫННА

 

Бүгүн, сэтинньи 21 күнүгэр, улуус дьаһалтатын мунньахтыыр саалатыгар бэйэни салайыныы сэбиэтин уочараттаах мунньаҕа ыытылынна.

 

Мунньахха нэһилиэк баһылыктара, салалталар салайааччылара кыттыыны ыллылар. Мунньаҕы улуус баһылыга Дмитрий Тихонов иилээн ыытта, бүгүн көрүллэр боппуруостарга сэбиэт үлэтигэр ситиһиилэри баҕарда.

 

Бастакы боппуруоһунан киин балыыһа кылаабынай бырааһа Иннокентий Павлов бу сылга 10 ый түмүгүнэн киин балыыһа үлэтин-хамнаһын билиһиннэрдэ. Улуус баһылыга Дмитрий Тихонов нэһилиэк баһылыктарыгар оскуолаларга медицинскэй кылаастар арыллалларыгар интэриэстээх дьон киин балыыһа, үөрэҕирии салалтатын кытта үлэлэһэллэригэр этиини туруорда.

 

Култуура салалтатын салайааччыта Анна Исакова, спорт уонна физическэй култуура салалтатын салайааччытын солбуйааччы Иннокентий Баишев 68-с төгүлүн ыытыллар В.К. Степанов аатынан Култуура уонна спорт эстэпиэтэтин улуустааҕы хамыыһыйа оҥорбут балаһыанньатын билиһиннэрдилэр. Эһиилги сылга Улуу Кыайыы 80 сылын, улууспут төрүттэммитэ 95 сылын уонна Баһылай Манчаары төрөөбүтэ 220 сылын чэрчитинэн култуура уонна спорт эстэпиэтэтэ "Түмсүөҕүҥ, сомоҕолоһуоҕуҥ-эйэлээх олоҕу тутуоҕуҥ!" диэн девиһинэн ыытыллыаҕа. Иһитиннэрии кэнниттэн сэбиэт кыттыылаахтара уопсай балаһыанньаҕа кэккэ уларыйыылары киллэрдилэр. Түмүктээх бигэргэммит балаһыанньа улуус дьаһалтатын сайтыгар тахсыаҕа.

 

Улуус экэниэмикэҕэ салайааччыта Екатерина Павлова улууспутугар 2024-2030 сылларга Ил Дархан Айсен Николаев Саха сиригэр стратегическай ыйаахтарынан нэһилиэктэринэн туолуулара хайдах дьайыахтааҕын, туох үлэ барыахтааҕын, көрдөрүүлэри ситиһэргэ ыытыллар үлэни сырдатта. Улуус баһылыга Дмитрий Тихонов Ил Дархан 10 ыйааҕыттан 9 ыйааҕын олоххо киллэриигэ өрөспүүбүлүкэҕэ соҕотох пилотнай улуус буоларбытынан бөлөхтөрүнэн үлэ бара турарын иһитиннэрдэ, баһылыктары эппиэтинэстээх дьону кытта көдьүүстээх үлэ барарыгар тэҥҥэ үлэлииргэ ыҥырда.  

 

🔹Үөрэх салалтатын начаалынньыгын иитии үлэҕэ солбуйааччы Нюргуяна Варламова 2024 сылга сайыҥҥы бириэмэҕэ оҕо аймах сынньалаҥын хааччыйыы уонна доруобуйаларын чэбдигирдии үлэтин кэпсээтэ. Нюргуяна Аркадьевна быйыл оҕо сайыҥҥы сынньалаҥар көрүллүбүт бүддьүөт толору туһаныллыбытын, сыал-сорук туолбутун, билигин отчуот үлэтэ бүппүтүн иһитиннэрдэ. Нэһилиэк баһылыктарыгар 2025 сыллаах оҕо сайыҥҥы сынньалаҥын хампаанньата кэлэр ыйтан саҕаланарын бэлиэтээтэ.

 

🔹Оройуон дьокутааттарын Сэбиэтин бэрэссэдээтэлэ Иннокентий Андросов уонна улуустааҕы биир кэлим дьуһуурунай-диспетчерскэй сулууспа начаалынньыга Афанасий Максимов бу күһүн анал байыаннай дьайыыга сылдьар байыастарбытыгар бөлөҕү тэрийэн көмөнү илдьибиттэрин сырдаттылар. Бары көмөлөспүт бар дьоммутугар махталларын биллэрдилэр.

 

🔹Улуус дьаһалтатын тэрийэр үлэҕэ салалтатын салайааччыта Айталина Сыроватская

 2024 сыл түмүгүнэн улуус баһылыгын отчуотун хаамыытын, уопсай тэрээһин боппуруостарынан иһитиннэрии оҥордо.

 

 

Мэҥэ Хаҥалас улууһун дьаһалтатын пресс-сулууспата