Бэс ыйын 2 күнүгэр Г.Г. Колесов аатынан Олоҥхо дьиэтигэр улууспутугар бэлиэ күн бэлиэтэннэ.

Бэс ыйын 2 күнүгэр Г.Г. Колесов аатынан Олоҥхо дьиэтигэр улууспутугар бэлиэ күн бэлиэтэннэ.

Ол курдук, биир дойдулаахпыт, Баатара нэһилиэгиттэн төрүттээх

саха чулуу олоҥхотун аан дойду

үрдүнэн аар-саарга аатырдыбыт РСФСР, Саха АССР үтүөлээх, Саха АССР норуодунай артыыһа, ССРС суруйааччыларын сойууһун чилиэнэ, П.А. Ойуунускай аатынан судаарыстыбаннай бириэмийэ лауреата, уһуйааччы

Гавриил Гаврильевич КОЛЕСОВ

аата алмаас тааска иҥэриллибитинэн үөрүүлээх тэрээһин тэрилиннэ.

2022 сыл алтынньы 3 күнүгэр "Юбилейнай" туруупкаҕа көстүбүт 60,99 карааттаах алмаас тааска, 2023 сыл тохсунньу 26 күнүгэр 01.11.-П бирикээһинэн Гавриил Гаврильевич аата иҥэриллибитэ.

Бу дьоһун дьоро түһүлгэҕэ, историяҕа хаалар түгэҥҥэ "Алроса" аахсыйалаах хампаанньа судаарыстыбаннай былаас уорганнарын кытта үлэҕэ салаатын салайаччытын солбуйааччыта, философия билимин хандьыдаата, социолог

Анатолий Дмитриевич Бравин

алмаас таас репликатын Олоҥхо дьиэтин салайаччытыгар Евдокия Ивановаҕа туттарда.

Бу үөрүүлээх түгэҥҥэ, улуус баһылыга Дмитрий Тихонов "Алроса" аахсыйалаах хампаанньаҕа махталын биллэрэн, саҥа талыллыбыт генеральнай дириэктэргэ Павел Маринычевка улууспут уустара чочуйан таһаарбыт оҥоһуктарынан бэлэҕин Анатолий Бравиҥҥа туттарда.

Ыраахтан-чугастан ыҥырыылаах ыалдьыттар тоҕуоруһа мустаннар үөрүүлэрин үллэстэн, Гавриил Колесов дьоһун олоҕун санаан-ахтан аастылар.

Бу курдук Гавриил Гаврильевич аата алмааска үйэтийбитин оҕолоро, биир дойдулаахтара, бииргэ үлэлээн, алтыһан ааспыт доҕотторо, үөлээннээхтэрэ үөрэ уонна махтана бэлиэтээтилэр.

Мэҥэ Хаҥалас улууһун дьаһалтатын пресс-сулууспата