Бэс ыйын 3 күнүгэр Моорук нэһилиэгэр бары ытыктыыр киһибит -

Бэс ыйын 3 күнүгэр Моорук нэһилиэгэр бары ытыктыыр киһибит -

Саха Өрөспүүбүлүкэтин култууратын үтүөлээх үлэһитэ, поэт, прозаик, оҕо суруйааччыта, кыраайы үөрэтээччи, Мэҥэ Хаҥалас улууһун, Уус Алдан Мүрү нэһилиэгин бочуоттаах олохтооҕо

Иннокентий Михайлович Сосин

төрөөбүтэ 95 сылыгар аналлаах

«Суосун сарыаллаах Суолата»

диэн аан бастакытын ыытыллар ырыа, хоһоон түһүлгэтэ ыытылынна.

Иннокентий Михайлович олорбут дьиэтигэр мемориальнай дуосканы үөрүүлээх быһыыга-майгыга арыйдыбыт.

Төрөппүт кыргыттара Октябрина Иннокентьевна уонна Дария Иннокентьевна, кинилэр оҕолоро, сиэннэрэ, Моорук нэһилиэгин олохтоохторо, улуус баһылыгын социальнай уонна имиджевэй бэлиитикэҕэ солбуйааччы Альбина Григорьева, улуустааҕы култуура салалтатын салайааччыта Анна Исакова, Марианна Никанорова салайааччылаах улуустааҕы киин бибэлэтиэкэ кэлэктиибэ, Наталья Пахомова салайааччылаах "Таммахтар" литературнай түмсүү кыттыылаахтара итиэннэ алтыспыт доҕотторо, үөрэнээччилэрэ, айар куттаах дьон түмүстүлэр.

«Суосун сарыаллаах Суолата» ыһыахтыыр түһүлгэ алгысчыт Зиновий Игнатьев алгыс сиэрин-туомун түһэриититтэн саҕаланна.

Хатыҥнарынан киэркэйбит түһүлгэни талба талааннаах дьон Иннокентий Михайлович хомоҕой хоһооннорунан ыллам ырыалар ылланнылар.

Амма, Уус Алдан улуустарыттан, улууспут араас нэһилиэктэриттэн барыта түөрт уонча кыттааччы "Ырыаларым – саныыр санаам саҕахтара" ырыа аһаҕас куонкуруска,

"Алаас ахтылҕаннаах ырыаһыта" инсценировка куонкуруһугар кытыннылар,

ону тэҥэ ахтыы киэһэтэ уонна "Биир сайын Суолаҕа" музыкальнай испэктээгинэн түмүктэннэ.

Иннокентий Суосун сырдык аатын үйэтитиигэ, айар үлэтин киэҥ араҥаҕа тарҕатар, кэнчээри ыччакка тиэрдэр сыаллаах "Суосун сарыаллаах суолата" бырайыак икки сылга биирдэ ыытыллар буолара былааннанар.

Суосун сүгүрүйэр Суола үрэҕин сүүрүгүн курдук, аата куруук ааттана, ахтылла турдун! "Суосун сарыаллаах суолата" бырайыак кэҥээн, сайдан истин!

Мэҥэ Хаҥалас улууһун дьаһалтатын пресс-сулууспата