БӨКӨЛӨР РЕЙСОВАЙ АВТОБУС СЫРЫЫТЫН ТУРУОРСАЛЛАР

БӨКӨЛӨР РЕЙСОВАЙ АВТОБУС СЫРЫЫТЫН ТУРУОРСАЛЛАР

Догдоҥо нэһилиэгэр улуус салалтатын сыллааҕы үлэтин отчуотун 42 олохтоох кэлэн иһиттэ.

Мунньаҕы нэһилиэк баһылыга Петр Сивцев саҕалаата. Бөлөх үлэтигэр нэһилиэктэн улуус мунньаҕын дьокутаата Иван Пивоваров кыттыста.

Улуус баһылыга Дмитрий Тихонов отчуотун кэнниттэн ыйытыыларга хоруйдааһыҥҥа, этиилэри истиигэ киирдилэр.

Мунньах хаамыытынан олохтоохтор тыа хаһаайыстыбатын, суол-иис, анал байыаннай дьайыы туһунан туоһуластылар. Ол курдук:

⁃ «Союз» кэпэрэтиип нөҥүө үүт туттарыытын,

⁃ сүөһү ылыытыгар улуус бүддьүөтүттэн туох көмө көрүллэрин,

⁃ чааһынай дьоҥҥо сылгы атыылаһааһыҥҥа тоҕо субсидия көрүллүбэтин,

⁃ сайылык туттуутугар, техника ылыныыга туох көмө баарын,

⁃ урукку Манчаары кэпэрэтиип иэһэ ханна тиийбитин,

⁃ "Майа-Бөкө" суола саас, күһүн аайы алдьаныытын ким хонтуруоллуурун,

⁃ өрүһү туоратар салгын олбохтоох суудуналар сыаналарын түһэрсиини,

⁃ ходуһа сирин сир кодексынан бас билиигэ биэриини,

- анал байыаннай дьайыыга сылдьар уолаттарга хомуллубут үп отчуотун,

- уолаттар барбаттарын гына туох үлэ ыытылларын,

- дьайыы кыттааччыларыгар Аллараа Бэстээххэ сир биэрии боппуруоһун.

Улуустааҕы тыа хаһаайыстыбатын салалтатын салайааччыта Иннокентий Семенов:

⁃ Үүт туттарыахха сөп, ол эрэн төбөтүгэр ылыы төлөбүрэ суох буолар, сүөһү ылыытыгар 50% субсидия көрүллэр, өскөтүн тыыннаах ыйааһынынан киилэтигэр 250 солкуобайга тэрээһиннээх хаһаайыстыбалартан, эбэтэр улуус таһыттан ирдэнэр докумуоннардаах чааһынай дьонтон ылбыт буоллаххытына, - диэн быһааран биэрдэ.

Олохтоохтор сүрүннээн "Майа-Бөкө-Майа" хайысханан рейсовай автобус,

Сотоҕо барыыга тибиигэ суол сүтэринэн суол астарыыга грейдер сырыытын туруорустулар.

Тутулла турар култуура уонна спорт киинин тиһэҕэр тиэрдэллэрин хонтуруоллуоххайыҥ, нэһилиэктэн турбут улуус мунньаҕын дьокутаатын отчуот ыытарын күүтэбит, Туораахтаах күөлү чөлүгэр түһэриэххэ, Бэрдьигэстээх Эбэҕэ балык ыытыытыгар кыттыа этибит диэн этиннилэр.

Сонно тута улуустааҕы суол хаһаайыстыбатын салалтатын тутаах үлэһитэ Ньургун Оконешников? улууска быйыл грейдер ылынан суол көрүүтүн үлэтин күүскэ ыытыахпыт диэн этиитин дьон-сэргэ сэргии иһиттэ.

Ону тэҥэ кэммиэрчискэйэ суох тэрилтэлэргэ көрүллэр бырагыраамалары,

итии уу холбонуутун, инбэлииттэргэ туох льгота баарын, көҥүл сылдьар ыттары хонтуруоллааһын ким эппиэтинэһигэр баарын, бүддьүөккэ төһө иэстээхпитин, тулаайах оҕолору дьиэнэн хааччыйыы бырагырааматынан хаһан дьиэ биэрэллэрин, Чыамайыкыга алмаас булуллуутун

туһааннаах тэрилтэлэр, салалталар салайааччыларыттан ыйыталаһаннар тута хоруй ыллылар.

Былырыыҥҥы отчуот боротокуолугар киирбит уон туруорсууттан үһэ туолбут, алтата хонтуруолга ылыллан үлэ бара турар.

Олохтоохтор отчуоту сэргии истибиттэрин, салалта үлэтин биһирииллэрин биллэрдилэр.

Николай Новгородов "Халлаан аҕалаахпын" диэн ырыатынан отчуоттуур бөлөҕү атаардылар.

Мэҥэ Хаҥалас улууһун дьаһалтатын пресс-сулууспата