Бүгүн, ахсынньы 25 күнүгэр.

Бүгүн, ахсынньы 25 күнүгэр, улуус дьаһалтатыгар бэрээдэги кэһиини уонна ыксаллаах быһыыны-майгыны сэрэтэр хамыыһыйа мунньаҕа ыытылынна. Хамыыһыйа хаамыытын улуус баһылыга Дмитрий Тихонов салайан ыытта. Мунньахха тустаах тэрилтэ салайааччылара кыттыыны ыллылар.

Саҥа дьыллааҕы тэрээһиннэри ыытыыга уонна сынньалаҥ кэмнэригэр баһаартан, айан суолугар сэрэхтээх буолууну күүһүрдэр туһунан, миэстэтигэр олохтоох дьаһалталар, эппиэтинэстээх тэрилтэлэр бу күннэргэ дьуһуурустуба олохтоон хонтуруолга туталларыгар быһаарыныы ылылынна.

Ытыктабыллаах улууспут олохтоохторо, биир дойдулаахтарбыт!

Тыйыс тымныылаах кыһыммыт хабараан тымныы күннэрэ туралларынан халыҥнык таҥна, тимир көлөҕүтүн көрүнэ сылдьаргытыгар ыҥырабыт.

Сыллата буоларын курдук, дьаҥ-дьаһах турар кэмигэр иҥэмтиэлээх сахалыы бэйэ аһын аһаан, доруобуйаҕытын көрүнэн, бириэмэтигэр анал идэлээх быраастарга көрдөрүнэн бэйҕитин эрдэттэн харыстаныҥ диэн сүбэлиибит.

Ититэр тэриллэри туттарга сэрэхтээх буолуҥ.

Дьиэҕитин-уоккутун, чугас дьоҥҥутун баһаартан харыстааҥҥыт АДПИ-та туруорунаргытыгар ыҥырабыт. АДПИ - баһаар турбутун тута сэрэтэр автономнай тэрил, көмөтө олус улахан. Холобур, бу тэрил эрдэ тыаһаабытын түмүгэр, баһаартан элбэх киһи быыһаммыта бэлиэтэнэр. Онон тустаах тэрили туруортарар ордук.

Тимир көлөнү кэмигэр өрөмүөннээн көрүнэ, оҥосто сылдьыҥ.

Айаҥҥа, суолга-иискэ болҕомтолоох, эппиэтинэстээх буоларбытын умнумуохха. Тымныы, дьыбардаах күннэргэ уһун айантан туттунуохха.

Суолга тохтоон турар массыынаны ааһа барымыахха, сатыы хааман иһэр дьоҥҥо көмөлөһүэххэ. Бэйэ-бэйэбитигэр, чугас дьоммутугар күүс-көмө, өйөбүл буолуоххайыҥ.

Ордук болҕомтону оҕолорго уонна саастаах дьоммутугар ууруоххайыҥ.

Үтүө дьыала сүүс төгүл эргиллэрин умнумуоххайыҥ!

Мэҥэ Хаҥалас улууһун дьаһалтатын пресс-сулууспата