Бүгүн, балаҕан ыйын 29 күнүгэр, Тумул тыа хаһаайыстыбатын оҥорон таһаарар кэпэрэтиибэ Дьаам сайылыгын саҥардан, аныгы ирдэбиллэргэ эппиэттиир.

Бүгүн, балаҕан ыйын 29 күнүгэр, «Тумул» тыа хаһаайыстыбатын оҥорон таһаарар кэпэрэтиибэ Дьаам сайылыгын саҥардан, аныгы ирдэбиллэргэ эппиэттиир, бары өттүттэн табыгастаах гына чөлүгэр түһэрэн үлэтин ситэрбит күнүн бэлиэтээтэ.

Оройуон депутаттарын Сэбиэтин бэрэссэдээтэлэ Иннокентий Андросов уонна улуустааҕы тыа хаһаайыстыбатын салайааччытын солбуйааччы Александр Борисов бу үөрүүлээх түгэнинэн кэпэрэтиип салайааччытын Таисия Васильевнаны уонна бары үлэһиттэри эҕэрдэлээтилэр.

Ол курдук, икки сыл устата бэйэ күүһүнэн уонна улууска Тыа хаһаайыстыбатын сылларынан сайылыктары чөлүгэр түһэриигэ анаммыт биир мөлүйүөннээх баһылык гранын туһанан, уопсайа үс мөлүйүөн сэттэ сүүс тыһыынча суумалаах өрөмүөн үлэтэ ыытыллыбыт. Алта да алталаах икки олорор дьиэ, үүт тутарга уонна осеменениеҕа анал сирдэри, тэҥинэн 120 ынах ыанар алта секциялаах титиик өрөмүөнүн ыыппыттар.

Ынах-сүөһү иитэр, бурдугунан дьарыгырар «Тумул» тыа хаһаайыстыбатын оҥорон таһаарар кэпэрэтиибэ 2002 сыллаахха тэриллэн билигин 600-эн тахса төбөлөөх, 200-эн тахса ыанар ынахтаах. Олортон 112 ыанар ынах Дьаам сайылыкка сайылыыр. Манна тоҕус ыал олорор. Бу ыаллары барыларын «Тумул» кэпэрэтиип үлэнэн хааччыйар, олорор усулуобуйаларын тупсарар.

Таисия Васильевна сатабыллаах салайыытынан «Тумул» кэпэрэтиип улууспутугар биир бастыҥ үлэни ыытар кэпэрэтиип буолар.

Үтүө үлэһит дьоммутугар үрдүк көрдөрүүлээх үлэҕит тиһигин быспакка салгыы баран иһэргитигэр, элбэх инники соруктар туолалларыгар, баай уопукка тирэҕирэн, инники диэки өссө кэҥээн-тэнийэн, тупсан-сириэдийэн иһэргитигэр баҕарабыт!

Мэҥэ Хаҥалас улууһун дьаһалтатын пресс-сулууспата