Бүгүн, балаҕан ыйын 7 күнүгэр, Майа сэлиэнньэтигэр саҥардыллыбыт.

Бүгүн, балаҕан ыйын 7 күнүгэр, Майа сэлиэнньэтигэр саҥардыллыбыт, чөлүгэр түспүт М.К. Попова аатынан Оҕо ускуустубатын оскуолатын арыллыыта буолла.

Уһуйаан “Култуура” федеральнай бырагыраамаҕа ситиһиилээхтик кыттан, кыайан, граҥҥа тиксэн улахан өрөмүөн үлэтин ааһан, быйыл күһүн кырачааннарын үтүө, тупсаҕай көстүүлээх көрүстэ.

Бу күн ыҥырыылаах күндү ыалдьыт быһыытынан СӨ култууратын миниистирэ Юрий Куприянов кэлэн мустубут бар дьону оскуола арыллыытынан итиитик-истиҥник эҕэрдэлээтэ.

Оскуолаҕа култуура министиэристибэтин аатыттан салгыы үүнэ-сайда чэчирии турарыгар анаан 100 000 уу харчынан туоһу сурук туттарда.

Улуус култууратын салалтатын аатыттан салайааччы Анна Исакова оскуолаҕа саҥа миэбэл ылыналларыгар 50 000 суумаҕа туоһу сурук анаата.

Улуус баһылыгын тутууга солбуйааччы Василий Филиппов, Дьокуускайдааҕы Култуура уонна Ускуустуба колледжын дириэктэрэ Захар Никитин уонна Майа сэлиэнньэтэ тыа сирин түөлбэтин баһылыга Алексей Неустроев бары мустубут үөрэнээччилэри, учууталлары саҥа үөрэх дьыла саҕаламмытынан, саҥардыллыбыт, сырдык, ыраас оскуолаламмыттарынан эҕэрдэлээтилэр.

Салайааччылар СӨ Култууратын миниистиригэр Юрий Куприяновка, оскуола дириэктэригэр Василий Захаровка уонна өрөмүөн үлэтигэр туох баар күүс-көмө буолбут тэрилтэлэр бэрэстэбиитэллэригэр эҕэрдэ, махтал суруктары туттардылар, өйдөбүнньүк бэлэхтэри анаатылар.

Сахалыы сиэринэн алгысчыт Илгэлээх Испиридиэн аал уот оттон сиэр-туом толордо, бар дьону арчылаата.

Салайааччылар аалай лиэнтэни быспыттарын кэнниттэн сырдык, ыраас эйгэлээх оскуола чуораан чугдаар оҕо аймах саҥатынан туолла.

Талааннаах үөрэнээччилэр ыалдьыттарга оркестрынан чаҕылхай кэнсиэр көрдөрдүлэр. Оскуолаҕа саҥа дьоллоох үөрэх дьыла саҕаланна.

Мэҥэ Хаҥалас улууһун дьаһалтатын пресс-сулууспата