Бүгүн, бэс ыйын 22 күнүгэр.

Бүгүн, бэс ыйын 22 күнүгэр, баһылык Дмитрий Тихонов улуус салайааччыларыныын Кытай Норуодунай Өрөспүүбүлүкэтин Муданьцзян куоратын баһылыгын солбуйааччы Ли Юйцзюнь оробуочай дэлэгээссийэтин кытта көрүстэ. 2010 сыллаахтан биһиги улууспут бу куораты кытары доҕордуу сыһыаннаах. Бу сыллар тухары олох араас хайысхатыгар бииргэ үлэлэһэн кэллилэр.

Инникитин даҕаны кэскиллээх суолу тутуһар санааттан, төгүрүк остуол тула олорон, Мэҥэ Хаҥалас улууһун дьаһалтата уонна Кытай куоратын салалтата сайдыы суолларын тобулууга санаа атастастылар.

Көрсүһүү туһунан улууспут баһылыга Дмитрий Тихонов:

- Муданьцзян куораты кытта биһигини өр сыллаах доҕордоһуу, хардарыта бэйэ-бэйэҕэ көмөлөсүһүү сыһыана ситимниир. Ол курдук, кинилэр биһиги улуус оҕолоругар Муданьцзян куорат университетыгар тус сыаллаах миэстэлэргэ тиксэн, аныгы олоҕу кытта тэҥҥэ хаамсар идэни баһылыырга, билии-көрүү ылалларыгар кыах биэрбиттэрэ. Бэйэлэрин кэмнэригэр кытай доҕотторбут спорт эйгэтигэр теннискэ элбэх оҕолорбутун дьарыктаан, куорсун анньан үрдүккэ көтүппүттэрэ, улууспут оҕолоро өрөспүүбүлүкэҕэ мэлдьитин бастыыр буолбуттара.

Хамсык кэмигэр кинилэргэ биһиги улуус дьоно биир бастакынан медицинскэй мааскалары ыытан көмө оҥорбуппут. Бу дьаҥ быстах кэмҥэ биһигини төһө да тэйитэ сырыттар, онлайн сибээһинэн ситиммитин быспакка тутан кэллибит. Билигин өссө өрө таһаарыылаахтык бииргэ үлэлэһэргэ бэлэммит. Доруобуйа харыстабылыгар, тыа хаһаайыстыбатын сайыннарыыга, оҥорон таһаарыыга, социальнай-экономическай хайысхаҕа, спорт эйгэтигэр – иннибит диэки эрэллээхтик биир хардыынан баран иһиэхпит диэн эрэнэбин. Сарсын өссө биир форум, санаа атастаһыыта, сүбэ мунньах күүтэр. Ол түмүгүнэн хардарыта бииргэ үлэлэһэргэ сөбүлэҥ түһэрсиэхпит.

Мэҥэ Хаҥалас улууһун дьаһалтатын пресс-сулууспата