Бүгүн, муус устар 23 күнүгэр.

Бүгүн, муус устар 23 күнүгэр, улууспут баһылыга Дмитрий Тихонов нэһилиэк баһылыктарын кытта быһа сибээһинэн нэһилиэктэргэ сааскы халаан уутун куттала суох аһарыыга бэлэмнэнии уонна санитарнай ыраастаныы үлэлэрин ыытыы боппуруостарын тула мунньаҕы ыытта.

Мунньахха улуус баһылыгын бастакы солбуйааччы Василий Михайлов, тутууга солбуйааччы Василий Филиппов, улуус дьаһалтатын үлэтин тэрийэр уонна үлэһиттэрин салайар салаа салайааччыта Станислав Захаров, улуус дьаһалтатын суол хаһаайыстыбатын салалтатын начаалынньыга Нюргун Оконешников уонна “Роспотребнадзор” Мэҥэ Хаҥаластааҕы салаатын салайааччыта Александр Павлов кытыннылар.

Халлааммыт сылыйан, кыстык хаарбыт уулунна, онон буоларын курдук, олорор-үлэлиир түөлбэбитигэр, уулуссаларбытыгар ырааһырдыы үлэтин күргүөмнээхтик ыытарбыт наада. Улууспут олохтоохторун, тэрилтэлэрбитин көхтөөхтүк субуотунньуктары тэрийэн, бэйэҕит аттынааҕы уонна сыһыарыллыбыт сирдэргитин хомунан, Өрөспүүбүлүкэбит күнүн, Күөх Маайы, Улуу Кыайыы күнүн ыраас сирдээх-уоттаах, чэбэр көрсүөҕүҥ диэн бука барыгытын ыҥырабыт!

Мэҥэ Хаҥалас улууһун дьаһалтатын пресс-сулууспата