Бүгүн, от ыйын 21 күнүгэр.

Бүгүн, от ыйын 21 күнүгэр, Майа сэлиэнньэтин Д. Ходулов аатынан култуура киинигэр

от ыйын 12-16 күннэригэр Амма улууһугар ыытыллыбыт "Дьулуур" өрөспүүбүлүкэтээҕи XIV-с спорт адаптивнай көрүҥнэринэн спартакиадаҕа күрэхтэспит улууспут сүүмэрдэммит хамаандатын чиэстиир түһүлгэ тэрилиннэ.

Улуус баһылыга Дмитрий Тихонов улууспут аатын үрдүк көрдөрүүлэринэн чиэстээхтик ааттаппыттарыгар махтанан туран,

хас биирдии кыттыыны ылбыт спортсменнарга, кинилэри бэлэмнээбит тириэньэрдэргэ харчынан бириэмийэ туоһу суруктарын туттарда.

Улуустааҕы физическэй култуура уонна спорт салалтатын салайааччыта Алексей Попов спартакиадаҕа хамаанда туруктаах буоларыгар, бочуоттаах иккис миэстэҕэ тахсарыгар үгүс сыралаах кылааттарын иһин бэрэстэбиитэллэри, кыттааччылары салалта бочуотунай грамотатынан наҕараадалаата.

Улуустааҕы үлэ уонна социальнай көмүскэллээх буолуу салалтатын салайааччытын солбуйааччы Александр Игнатьев спортсменнары кыайыынан эҕэрдэлээтэ.

Инбэлииттэр уопсастыбаларын бэрэссэдээтэлэ Тамара Пермякова

бу дьоһун ситиһиигэ сүдү кылааттарын киллэрбит тэрийээччилэргэ, кыттааччыларга, тириэньэрдэргэ, бэрэстэбиитэллэргэ барыларыгар махтал тылларын биллэрдэ.

Куруутун да бу курдук ситиһиилэр кэлэ,

улууспут аата үрдүк көрдөрүүлэринэн ааттана турдун!

Мэҥэ Хаҥалас улууһун дьаһалтатын пресс-сулууспата