Бүгүн, тохсунньу 27 күнүгэр.

Бүгүн, тохсунньу 27 күнүгэр, улуус салалтатын ааспыт сыллааҕы үлэтин отчуоттуур бөлөх Иннокентий Исаков баһылыктаах 1-кы Наахара нэһилиэгэр үлэлээтэ.

Улуус баһылыга Дмитрий Тихонов салайааччылаах бөлөх отчуотугар 66 олохтоох кэлэн, көхтөөхтүк кытынна, 40-ча ыйытыы, этии киирдэ. Үгүс ыйытыы суругунан бэрилиннэ.

Быйылгы дьылга нэһилиэккэ сайыҥҥы уу ситимэ тардыллара, нэһилиэк аҥаарын киин ититии ситимигэр холбонуутун үлэтэ ыытыллара, сэттэ ыалга "Газгольдер" автономнай күөх төлөҥҥө холбоноллорун үөрэтэн көрүү барара, үрдүк күүрүүлээх уот ситимигэр хапытаалынай өрөмүөн үлэтэ ыытыллара былааннанар.

Нэһилиэккэ сытыытык турар боппуруостары - оскуола тутуллуутун, быһыт оҥоһуллуутугар көмөнү, кулууп өрөмүөнүн, спорт саалатын экспертизалатан инникитин быһаарыыны, суолу оҥорууну, түргэн интернет ситимин тардыыны туруорустулар.

Олохтоохтор интэриэһиргиир ыйытыктарын хото биэрдилэр, ол иһигэр киирдилэр:

Доруобуйа харыстабылыгар: улууска быраастарынан хааччыллыы хайдаҕын, Хочо балыыһатын стационара тоҕо сабыллыбытын, рецебынан ылар эмп хааччыллыыта аҕыйаҕын, Майаҕа МРТ хаһан баар буолуоҕун, эми-тому атыылыы тоҕо кэлбэттэрин, өрөспүүбүлүкэттэн узкай быраастар нэһилиэктэри кэрийэ тоҕо тахсыбаттарын сурастылар.

Тыа хаһаайыстыбатын эйгэтигэр:

Тыа хаһаайыстыбатын сылынан туох көмө оҥоһулларын, саҥа техниканы атыылаһыыга биэнсийэлээх дьоҥҥо туох көмө көрүллэрин, ветеринарнай өҥө сыаната үрдүгүн, иккис ветеринар тоҕо көрүллүбэтин, сайылыкка уот тардыытыгар туох көмө баарын, кээпэрэтиип хотону тутарга улуус тугунан көмө буоларын, сэлээркэ сыаната үрдүгүн ыйыталаһан, толору хоруйдары ыллылар.

Ону тэҥэ:

- анал байыаннай дьайыы кыттыылаахтарын төрөппүттэригэр туох саҥа көмө баарын,

-социальнай хантыраакка биэнсийэлээх киһи кыттыан сөбүн, -кэлиҥҥи сылларга куйаас сайыннар тураннар, күммүт-дьылбыт да сылыйан ирбэт тоҥҥо хамсааһыннар буолалларынан чааһынай дьиэни көһөрүүгэ тоҕо туох да көмө суоҕун,

-уот төлөбүрэ тоҕо үрдүү турарын,

-Суолу оҥорууну ким хонтуруоллуурун,

-Аллараа Бэстээххэ элбэх оҕолооҕунан бэриллибит уһаайбаларга уота-күөһэ хаһан тардыллыаҕын,

-Водоканал тутуллуутугар үөрэтии үлэтин ыытар наадатын,

-Оскуолаҕа муусука уруогар патриотическай ырыалары үөрэтиини,

-Нэһилиэктэргэ уопсай баанньыктар наадалар,

-Аллараа Бэстээх маҕаһыыннарыгар бородуукта хаачыстыбатын кимнээх хонтуруоллуохтаахтарын туоһуластылар.

Түмүккэ Ил Түмэн дьокутаата Андрей Находкин, улуус дьокутааттарын Сэбиэтин бэрэссэдээтэлэ Иннокентий Андросов тыл эттилэр. Мунньах икки чаас устата, бэрт сэргэхтик, интэриэһинэйдик ыытылынна.

Мэҥэ Хаҥалас улууһун дьаһалтатын пресс-сулууспата