Быйыл саас I Баатара нэһилиэгэр үтүө үгэскэ кубулуйбут улуустааҕы Сылгыһыт күрэҕэ ыытыллыбыта. Бу тэрээһиҥҥэ Саамай эдэр кытааччы үрдүк аатын I Наахараттан төрүттээх.

Быйыл саас I Баатара нэһилиэгэр үтүө үгэскэ кубулуйбут улуустааҕы «Сылгыһыт күрэҕэ» ыытыллыбыта. Бу тэрээһиҥҥэ «Саамай эдэр кытааччы» үрдүк аатын I Наахараттан төрүттээх, 25 саастаах Герман Константинов сүкпүтэ. Үөрүүлээх быһыыга-майгыга дьоһун-мааны бирииһи - икки саастаах борооскуга сэртипикээти хаһаайыстыбатын «Совхоз имени 50 лет Октября» аатыттан Арассыыйатааҕа наука академиятын генеральнай дириэктэрин солбуйааччы Тихон Скрябин туттарбыта.

Бу соторутааҕыта, саха сайыны көрсөр үтүө кэмигэр, мэктиэлэммит тыыннаах борооску бирииһин, I Наахара эдэр сылгыһытыгар Гермаҥҥа Тихон Скрябин сыа-сым курдук аҕалан, анаан-минээн туттарда.

Тихон Скрябин бэлиэтээн туран эттэ:

- Бу кыһын бырабыыталыстыба отчуотугар тыа хаһаайыстыбатынан утумнаахтык дьарыктанан ылсан эрэр ыччаттарбытын өйүөххэ диэн этии киирбитэ. Бу бачыымы быһа гыммакка, тута өйөөн, аймах дьоммун кытта сүбэлэһэн баран, тус бэйэбит хаһаайыстыбабыт аатыттан бу төһүү бирииһи борооскуну, эдэр, өбүгэ ситимин салҕааччыга туттарарга санаммыппыт. Мэктиэлэммит бирииспин эт илиибинэн эдэр сылгыһыкка Гермаҥҥа үөрэ-аҕалан туттардым. Ынах-сүөһү төрдө буоллун, уйгулаах-быйаҥнаах олоҕу аҕаллын диэн ис сүрэхпиттэн сахалыы алҕаан туран.

Биһиги, эдэр сылгыһыт төрөппүттэригэр I Наахара нэһилиэгэр быһа сибээһинэн тахса сырыттыбыт.

Родион Петров, уол аҕата сэһэргиир:

- Сылын ахсын ыытыллар «Сылгыһыт күрэҕэр» биһиги нэһилиэк аатыттан куруутун көхтөөхтүк кыттабыт. Быйыл эмиэ баран кыттан кэлбиппит, онно уолбут Герман «Саамай эдэр кыттааччы» аатын сүкпүтүттэн, соһуйбуппут да, үөрбүппүт даҕаны. Кини – ыал улахан оҕото, сэттэ бииргэ төрөөбүттэриттэн. Ол иһин кыра эрдэҕиттэн сүрүн эрэлбит, төһүү көмөбүт улахан уолбут. Бырааттарын-балыстарын көрөн-истэн, бүөбэйдэһэн, тыа сирин туох баар күүс үлэтигэр кыттыһан улааппыта. Биһиги ыал 50 үөр сылгылаахпыт, үрэх баһыгар турар, уолбунуун кэлэ-бара сылдьан көрөбүт-харайабыт. 20 төбө ынахтаахпыт, онтон баһыйар өттө ыанар. Онно эбии бу толуу тыһы борооску кэлбитэ олус үөрүүлээх суол. Хаан уларытарга, инникитин ньирэй ыларга. Сүөһү төрдө буоллун. Хаҥаластан төрүттээх, биһиги улууспутун кытта бэрт үчүгэй доҕордуу сыһыанаах Тихон Скрябин тус бэйэтин хаһаайыстыбатын аатыттан маннык дьоһун-мааны бириис туруорбутун мин хайҕыы саныыбын. Бу курдук өбүгэ төрүт дьарыгын салҕыыр, утумнуур сахабыт ыччатын өйүүр дьон баар буоллахтарына, эдэр дьон сүөһүгэ-сылгыга сыстыа, удьуор-утум салҕаныа диэн мин бүк эрэнэбин. Барыгытыгар үчүгэйи эрэ баҕарабын.

Мэҥэ Хаҥалас улууһун дьаһалтатын пресс-сулууспата