Былдьаһыктаах күннэргэ туттумахтаан хаалыаҕыҥ!

Былдьаһыктаах күннэргэ туттумахтаан хаалыаҕыҥ!

Улууспутугар от үлэтин үгэнэ. Кэмиттэн кэмигэр курулатар ардахтаах күннэр быыстарыгар аҕыйах чэмэлкэй үтүө күннэр тураннар саха дьоно бүттүүн окко таҕыста.



Бүгүн биһиги Доллу нэһилиэгэр күүрээннээх от үлэтэ хайдах баран иһэрин билсэ тахса сырыттыбыт.

Доллу Эбэтигэр Стручковтар дьиэ кэргэн күнү-дьылы аахсыбакка оттуу сылдьалларыгар түбэстибит.

Николай Стручков дьиэ кэргэн аҕа баһылыга:

- Бу уолаттарбынаан номнуо төрдүс күммүтүн киирэн оттуу сылдьабыт.

Күн-дьыл туран биэрдэ. От үүнүүтэ быйыл былырыыҥҥытааҕар ордук.

Уолаттарым тута баайан иһэллэр.

Быйыл өҥ дьыл, маннык үтүө күннэр өссө да тура түстэллэр, син балайда сомсон хаалыахпыт буоллаҕа.

Киэҥ Эбэ үрдүнэн сөрүүн тыал сайа охсор, охсуллубут от сыта сүрэҕи-быары ортотунан киирэр, биир да аһыҥка суох. Дьикти, кэрэ эйгэ.

Доллу нэһилиэгин тыа хаһаайыстыбатын исписэлииһэ Елена Куличкина:

- Былырыын уопсай нэһилиэк күүһүнэн харчы хомуйан ыспыппыт, эмтээбиппит. Аһыҥканы эмтээһин – икки сыл дьайар.

Инньэ гынан былырыын да быйыл да өлгөм үүнүүнү ылан үөрүүбүт үрдүк.

Мэҥэ Хаҥалас улууһун дьаһалтатын пресс-сулууспата