Чүүйэлэр эстэпиэтэ былааҕын Тиэлигигэ тиксэрдилэр

Олунньу 21 күнүгэр, сааскылыы ылааҥы күн сырдыгын аргыстанан Чүүйэлэр Тиэлигилэргэ тиийдилэр.

Дьэ, бу күн, ыччат дьон толоруутугар оһуохай төлкөлөөх түһүлгэтин төрүттээн 1-кы Наахаралар күн үҥкүүтүн өрө көтүттүлэр. Номоххо киирбит кылыгырыы тохтор кылыһахтаах куоластаах кэрэтэ оҕотуттан саҕалаан манна мустубутун астына иһиттибит. Оҕолорго Амелия Захарова, ыччат дьоҥҥо Сардаана Пахомова, улахан дьоҥҥо Дьулустаан Михайлов бука лауреат аатын ыллылар. Тиэлигилэр оһуохайдара 4,17 баалынан сыаналанна.

Уус-уран оҥоһук быыстапкатыгар ирдэнэр көрүҥҥэ барытыгар үлэ туруоруллубут. Ордук туос иһит-хомуос мааныта хото тигиллэн туруоруллубутун астына көрдүбүт. Иккис бөлөххө бу эрэ күн ат тэриллэрин: иҥэһини уонна уостуганы саҥа саҕалыыр уус Давид Трофимов туруоран биһирэннэ.
Түмүккэ Екатерина Захарова, Ирина Петрова, Мария Потапова, "Күбэйэ" түмсүү, Маргарита Денисова, Алина Нестерова, Татьяна Александрова, Татьяна Неустроева, Раиса Местникова, Давид Трофимов ааттаннылар. Дипломант ааттарынан Иван Устинов, Марфа Макарова, Наталья Денисова, Анна Александрова, Григорий Ильин, Иван Оконешников, Светлана Александрова, Николай Игнатьев биһирэннилэр. Тиэлигилэр быыстапкалара 4,12 баалынан сыаналанна.

Чүүйэлэр кэнсиэрдэрин кэрэхсэллээх көстүүтүнэн үгүс ыччат кыттыбыта буолла. Үҥкүү бөлөҕүн ыччат дьонун састааба, ырыа бөлөхтөрүгэр эдэр уолаттар хото кыттыбыттара кэнсиэри киэргэттэ.
Лауреат үрдүк аатын дьүүллүүр сүбэ хор коллектива, "Дабаан" эр дьон ансаамбыла, "Мичээрдэр" дьахталлар ансаамбыллара, "Кылыҥкай" үҥкүү бөлөҕө "Синий платочек" уонна "Дьиэрэҥкэй" үҥкүүлэрэ, эдэр ыччат квартета, "Биэстээх бээтиниссэ" сценка, "Дэгэрэҥ" бөлөх фольклорнай композицията, Александр, Иннокентий Осиповтар ыллылар. Дипломаннарынан "Дэгэрэҥ" бөлөх чабырҕаҕа, Сахаяна Иванова, "Ходоро хоһууттара" уус-уран ааҕыы, оригинальнай жанр, Кай Эверстов уонна ыччат блога буоллулар. Чүүйэлэр кэнсиэрэ 4,17 баалы ылла.

Иккис бөлөххө ити курдук киирсии сытыырхайар, хас биирдии айан күнэ саҥа ааттары арыйар!

Мэҥэ Хаҥалас улууһун култуураҕа уонна духуобунай сайдыыга салалтатын Информационнай методическай киинин салайааччыта Галия Сосина