Доллу ыһыаҕа

Бэс ыйын 28 күнүгэр, Арассыыйаҕа Уһуйааччы уонна Аҕа сүбэһит, Өрөспүүбүлүкэҕэ - Үлэ, Успуорт уонна физкультура министиэристибэтин 100, Мэҥэ Хаҥалас улууһугар тыа хаһаайыстыбатын сылларын көрсө; Доллу нэһилиэгэр -сахаҕа аан бастакынан промышленноска суол тэлбит сүдү киһибит Тарас Гаврилович Десяткин 95 сааһыгар анаммыт өрөгөйдөөх Үрүҥ Тунах ыһыах ыытылынна.

Ыһыах арыллыытыгар манна мустубут бар дьону, улуус баһылыга Дмитрий Тихонов итиитик-истиҥник эҕэрдэлээтэ. Үөрүүлээх-быһыыга-майгыга: нэһилиэк баһылыгар Николай Сивцевка, үлэ бэтэрээннэригэр, тыа хаһаайыстыбатын үлэһиттэригэр, үүнэр кэнчээри ыччаты иитиигэ көмүс кылааттарын киллэрсибит иитээччилэргэ уонна уһуйааччыларга, социальнай-култуурунай эйгэ исписийэлиистэригэр, улуус дьаһалтатын аатыттан Грамоталары туттарда. Тыа сирин туруу үлэһит дьоно: ньирэй көрөөччүлэр, ыанньыксыттар, иистэнньэҥнэр, тырахтарыыстар уо.д.а. элбэх туһунан идэлээхтэр, бу күн киэҥ түһүлгэҕэ, бар дьоннорун иннигэр, улуус салалтатын аатыттан үрдүктүк чиэстэннилэр уонна наҕараадаланнылар.

Саха далбар хотуттара толору кутуллубут чороонноох кымыстарынан түһүлгэҕэ мустубут хаан-уруу дьоннорун, ыалдьыттары күндүлээтилэр.

Ыһыах дьонугар бэйэтин истиҥ эҕэрдэ тылын, Саха Өрөспүүбүлүкэтин Судаарыстыбыннай Мунньаҕын (Ил Түмэн) тыа сиригэр уонна аграрнай бэлиитикэҕэ бастайааннай кэмитиэтин бэрэссэдээтэлэ Андрей Находкин анаата. Доруобуйа харыстабыла, аграрнай бэлиитикэ; наука, үөрэх, култуура, сонуну киэҥник тарҕатыы сис кэмитиэттэрин ааттарыттан бу эйгэлэргэ ситиһиилээхтик үлэлии-хамныы, айа-тута сылдьар Доллу нэһилиэгин дьонугар Бочуотунай Грамоталары туттарда.

Бу күн сөбүгэр былытыран, сөбүгэр күн тыган, кыратык самыырдаан да буоллар, күммүт бэркэ туран биэрдэ. Дорҕоонноох оһуохай дуорайда, ылбаҕай ырыа ылланна, үҥкүү-битии дыгыйда, илии-атах оонньуута дьону-сэргэни түмтэ, уохтаах кымыс, үтэһэлээх эмис эт сандалыга тардылынна. Дьон-сэргэ өр кэтэспит, күүтүүлээх ыһыахха дууһалыын сынньанна, санаалыын сырдаата.

Мэҥэ Хаҥалас улууһун дьаһалтатын пресс-сулууспата