Дьолуо суолу тутуһан - Дьоруой дойдутугар!

Мэҥэ Хаҥалас улууһун киэн туттуута буолбут 68 төгүлүн тэриллэр В.К. Степанов аатын сүгэр Култуура уонна успуорт эстафетата иккис бөлөххө олунньу 15 күнүгэр Баатара нэһилиэгэр оһуохай түһүлгэтинэн төрүттэннэ. Иккис бөлөх дьүүллүүр сүбэтин бэстибээл саамай уопуттаах жюрита, Мэҥэ Хаҥалас улууһун Г.Г. Колесов аатын сүгэр Олоҥхо дьиэтин дириэктэрэ Евдокия Иванова салайан үлэлэтэр.

Мэҥэлии оһуохайы Сыымах түөлбэтин талааннаахтара Саргылаана Неустроева, кэскиллээх этээччи Тускун Эверстов, талааннаах эдэр ыччат Александра Созонова таһаараннар, 25 киһилээх түһүлгэни төрүттээн үүммүт күммүтүн алҕаан арыйдылар. Көрүү түмүгүнэн Тускун Эверстов уонна Саргылана Неустроева дипломант, Александра Созонова лауреат үрдүк аатын ыланнар, Баатара нэһилиэгин оһуохайын түһүлгэтэ 4,06 баалынан сыаналанна.

Баатара нэһилиэгин талба талааннаахтарын уус-уран оҥоһуктарын быыстапкатыгар 46 уран тарбахтаах 311 үлэни туруордулар. Лауреаттарынан Лука Романов, Кэскил Романов, Зоя Захарова, "Ыаҕыйа" туос оҥоһуктар түмсүүлэрэ, Егор Плотников, Афанасий Бродников, "Арылы" туой оҥоһуктар түмсүүлэрэ ааттаннылар. Быыстапка түмүгүнэн дипломант аатын ыллылар Айталина Павлова, Ирина Винокурова, Айталина Михайлова, Любовь Жиркова, Эльза Эверстова, Лидия Варламова, Вера Попова. Көхтөөх кыттыытын иһин грамотанан Василий Попов уонна Акулина Николаевна Попова сыдьааннарын хомуур оҥоһуктарын быыстапката биһирэннэ. Баатара нэһилиэгин талба талааннаахтарын уус-уран быыстапката 4.09 баалынан сыаналанна.

Икки нэһилиэк спортка доҕордуу көрсүүтүгэр Дьабыыл нэһилиэгэ 19,5 очукуолаах, 15,5 очукуолаах олохтоохтор хамаандаларын хотон, кыайыы өрөгөйүн биллэ.

Толору көрөөччүлээх саалаҕа Дьабыыл нэһилиэгин уус-уран самодеятельноһын кэнсиэрин дьон - сэргэ сэргээн көрдө. Лауреаттарынан хор толоруутугар "Тыыннаахтар умнубат сыллара" ырыа, Денис Оконешников тойуга, Екатерина Стручкова уус-уран ааҕыыта, "Сиккиэр" дьахталлар ансаамбыллара, Екатерина Стручкова уонна Любовь Самойлова авторскай "Мэҥэлэр хайа үрдүгэр" ырыалара, ыччат бөлөҕүн "Дьиэрэҥкэй" үҥкүүлэрэ ааттаннылар. Кэнсиэр дипломаннарынан Любовь Жиркова сольнай ырыата, ыччат "Чаҕылыс" чабырҕах бөлөҕө, "Нуоралдьыма" ветераннар үҥкүүлэрин кэлэктиибин "Молдавскай үҥкүүтэ", эр дьон толоруутугар бурятскай үҥкүү уонна эр дьон "Өркөн" ансаамбыла ааттаннылар. Дьабыыллар кэнсиэрдэрэ 4,09 баалынан сыаналанна.

Бар дьон талаанын кустук курдук суһумнатан, норуоту биир иллээх санааҕа ситимнээн, үйэлээх үтүө үгэспит - култуура уонна спорт эстафетата Сыымах үтүө түөлбэтигэр үрдүк күүрээннээхтик ыытылынна.

Култуура уонна духуобунай сайдыы салалтатын Информационнай методическай киинин салайааччыта Галия Сосина