ЭЛБЭХ ОҔОЛООХТОРГО ИПОТЕКАНЫ САБАРГА КӨМӨ ТӨЛӨБҮР

РФ бырабыыталыстыбатын 2019 с. балаҕан ыйын 7 күннээҕи 1170 -дээх уурааҕынан элбэх оҕолоох дьиэ кэргэҥҥэ ипотеканы төлүүргэ 450 000 солкуобай кээмэйдээх төлөбүр анаммыта.

Көмө харчыга 2019 сыл тохсунньутуттан 2023 сыл ахсынньы 31 күнүгэр диэри үһүстэрин эбэтэр онтон өссө оҕоломмут ыаллар тиксиэхтэрин сөп. Бу көмө дьиэ туттарга, кыбартыыра атыылаһарга, ИЖС бырагырааматынан сир учаастагын атыылаһарга ылыллыбыт ипотекаттан көҕүрэтиигэ бэриллэр.

Ипотека кирэдьиитин 2024 сыл от ыйын 1 күнүгэр дылы ылбыт буолуохтааххын. Оҕолор саастара уонна кэргэннии буолуу бэлиэтээһинэ оруолу оонньообот. Оҕо иитэ ылбыт дьон бу төлөбүргэ эмиэ тиксэр толору бырааптаахтар, өскөтүн иитэ ылбыт үһүс, эбэтэр онтон кэлэр оҕолоро 2019 сыл тохсунньу 1 күнүн кэнниттэн төрөөбүт буоллахтарына.

Көрүллүбүт 450 тыһыынча солкуобай кирэдьиит быраһыаныттан буолбакка, сүрүн иэһиттэн көҕүрэтиигэ барар.

Өскөтүн кирэдьиит ордубут иэһэ 450 тыһ. солкуобайтан кыра буоллаҕына, быраһыаныттан көҕүрэтэргэ барар.

Төрөппүт бырааптара быстыбыт эбэтэр оҕо иитэ ылыыга аккаас ылбыт дьоҥҥо төлөбүр көрүллүбэт.

Биир дьиэ кэргэн биир уопсай кирэдьииттэригэр хос-хос субсидия көмө ылар бырааптара суох, ол кэнниттэн эбии оҕоломмут да буоллахтарына.

Төлөбүрү маннык сыаллаах ылыллыбыт ипотеканы төлүүргэ туһаныахха сөп:

- Тутулла турар эбэтэр саҥа тутуллубут дьиэҕэ кыбартыыра атыылаһарга;

- Бэлэм дьиэни атыылаһарга (иккис ырыынак);

- Саҥа чааһынай дьиэни атыылаһарга эбэтэр туттууга;

- Тус бэйэ дьиэҕэ олорого анаммыт сир учаастагын (ИЖС) атыылаһарга;

- Кэтэх хаһаайыстыбатынан, оҕуруотунан дьарыктанарга сир учаастагын атыылаһарга (тутуу бүппүтүн уонна дьиэ регистрацияламмытын кэнниттэн);

- Ситэри тутуллубатах тус бэйэ дьиэҕэ олорого анаммыт (ИЖС) эбийиэги атыылаһарга;

- Эрэгийэн иһинээҕи чэпчэтиилээх бырагыраамаларынан олорор дьиэни атыылаһыыга;

- Уопсай бас билиилээх тутууга бүтэһик өлүүнү ыларга, өскөтүн түмүгэр гражданин бу эбийиэк бүттүүн бас билээччитэ буолар буоллаҕына;

- Рефинансированнай кирэдьиттэри сабарга, өскөтүн ол кирэдьиттэр барыта үөһээ ыйыллыбыт сыалларга анаммыт буоллахтарына.

Төлөбүр кэргэнниилэргэ эрэ буолбакка, оҕолорго эмиэ көрүллэр. Өскөтүн ийэ хапытаалын туһанан дьиэ-уот атыылаһарга кинилэр өлүүлэрэ эмиэ ааҕыллыбыт буоллаҕына.

Төлөбүрү туһанарга маннык докумуоннар ирдэнэллэр:

- Сайабылыанньа (бааҥҥа ылаҕын)

- Сайаапка түһэрэр киһи уонна оҕолорун пааспара (өскөтүн оҕолоро 14 саастарыттан үөһээ саастаах буоллахтарына);

- Ийэ, аҕа буолуутун туоһулуур докумуоннар (оҕо төрөөбүтүн , оҕону иитэ ылыы туһунан туоһу суруктар, төрөппүт буолуутун бигэргэтэр докумуоннар).

- Госпортал өҥөтүн нөҥүө оҥоһуллар буоллаҕына кирэдьиит дуогабара

- Мэктиэлээччи (поручитель) дуогабара, кирэдьиит ылбыт киһи уонна мэктиэлээччи сайаапка түһэрэр түгэннэригэр.

- Персональнай тус даанайдарын чинчийиигэ сайаапка түһэрээччи уонна оҕолорун тус сөбүлэҥнэрэ ( сөбүлэҥ форматын баантан ылыаххытын сөп).

Мэҥэ Хаҥалас улууһун дьаһалтатын пресс-сулууспата