ИЛ ТҮМЭН ДЬОКУТААТТАРЫН КЫТТА КӨРСҮҺҮҮ

ИЛ ТҮМЭН ДЬОКУТААТТАРЫН КЫТТА КӨРСҮҺҮҮ

Бүгүн, олунньу 20 күнүгэр, Иннокентий Андросов бэрэссэдээтэллээх оройуон Сэбиэтин дьокутааттара Дьокуускай куоратка киирэн Саха Өрөспүүбүлүкэтин Ил Түмэн Сударыыстыбаннай мунньаҕын дьокутааттарын кытта үлэ хаамыытынан көрүстүлэр.

Улуус Сэбиэтин дьокутааттара олохтоохтор туруорсууларынан

хаһаайына суох ыттарга миэрэлэри ылыыны,

тыа хаһаайыстыбатыгар көрүллэр субвенция кээмэйин тыырыы, оҥоһуллан тахсар бородууксуйа сыллааҕы кэриҥин быһаарыы боломуочуйатын муниципальнай оройуон бас билиитигэр биэриини,

Саха сирин усулуобуйатын, сылгыны үөрдээн иитиини учуоттаан туран саҥа ылыллан эрэр сылгы сокуонугар уларытыыны киллэриини,

чааһынай хаһаайыстыбалаахтарга самозанятай буолар түгэннэригэр үүт туттарыытыгар көрүллэр субсидияны биэриини,

субвенция кээмэйин ааспыт сыллааҕы көрдөрүүгэ олоҕуран уларытар,

субвенция ордуга хаалар түгэнигэр атын хайысхаҕа ыытар кыаҕы,

туттуллубат оттуур ходуһалары чааһынай дьонтон улуус фондатыгар атыылаһан ыларга үбү көрүүнү уонна ону наадыйар, саҥа тэринэр хаһаайыстыбаларга арендаҕа биэриигэ судаарыстыбаннай бырагырааманы олохтооһуну,

өрөспүүбүлүкэ бүддьүөтүттэн сүөһү ойоҕос бородуукталарын харайар, обработкалыыр, переработкалыыр эбийиэктэри тутууга үбүлээһини,

уот лиинийэтин тардыыга көрүллэр 500 миэтэрэни 30 килэмиэтиргэ дылы уһатыыны,

Саха сирин киинин ураты экологическай ситимигэр муҥутуур көҥүллэнэр дьайыы нуорматын олохтооһуну,

тыа сиригэр тыа хаһаайыстыбатын исписэлиистэрэ кэлэн олохсуйалларыгар «Земскай аграрий» бырагырааманы олохтооһуну, «Дальневосточнай ипотекаҕа» киллэриини,

«Сельскай ипотека» бэриллэр квотатын 60 тыһыынча киһиэхэ диэри үрдэтиини,

тыа хаһаайыстыбатын эйгэтигэр үлэлиир дьон биэнсийэҕэ тахсыыларын эр дьоҥҥо 55 саас, дьахталларга 50 саас буоларыгар уо.д.а. турбут боппуруостарга үлэлэһэллэригэр этии быһыытынан киллэрдилэр.

Көрсүһүүгэ Ил Түмэн дьокутааттара Андрей Находкин, Александр Атласов, Александр Корякин, Василий Егоров, Олег Марков, Тихон Скрябин, Иннокентий Романов кыттыыны ыллылар.

Ил Түмэн Сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Андрей Находкин кэскиллээх кэпсэтиилэр үлэҕэ сыал-сорук туруорарга толук буолалларын бэлиэтээн туран өссө даҕаны маннык көрсүһүүлэр ыытыллыахтара диэн эттэ.

Мэҥэ Хаҥалас улууһун дьаһалтатын пресс-сулууспата