Илин эҥэр улуустарыгар Оттооһун, кыстыкка бэлэмнэнии сүбэ мунньаҕа

Илин эҥэр улуустарыгар «Оттооһун, кыстыкка бэлэмнэнии» сүбэ мунньаҕа

От ыйын 10 күнүгэр Чурапчыга Саха Өрөспүүбүлүкэтин Бырабыыталыстыбатын бэрэссэдээтэлэ Андрей Тарасенко, СӨ Тыатын хаһаайыстыбатын миниистирэ Александр Атласов салалталарынан Мэҥэ Хаҥалас, Чурапчы, Таатта, Амма, Уус Алдан улуустарын баһылыктара кыттыылаах мунньах буолан ааста.

Сүбэ мунньахха баһылыктар быйылгы ыһыы үлэ түмүгүн, хаһаайыстыбаларга гранынан төһө тиэхиньикэ тиксибитин, окко киирии үлэтэ хайдах баран иһэрин, былаан быһыытынан төһө туонна от оттонуохтааҕын туһунан сырдаттылар.

Оробуочай мунньах сүрүннээн, үтүө күннэри баттаһа, мобильнай биригээдэлэри тэрийэн окко ыытыы, гидротехническай тутуулары (быһыттары) өрөмүөннээһин, ходуһалары нүөлсүтүүнү сөргүтүү, күрүө тутуута, үрэхтэри туоруур муосталары оҥоруу, өр сылларга үүнэр от култуураларын ыһыы, хаһаайыстыбалары финансовай чэбдигирдии курдук боппуруостар турдулар.

СӨ Бырабыыталыстыбатын бэрэссэдээтэлэ Андрей Тарасенко, саха дьоно уутуйан олорор, тыа хаһаайыстыбатынан утумнаахтык дьарыктанар Илин эҥэр биэс улууһун дьоно-сэргэтэ ыалдьар боппуоруостарын болҕойон истэн, тустаах салалталарга ыйыы-кэрдии биэрэн, инники былааҥҥа киллэрэн, сөптөөх дьаһал барыа диэн бигэргэтэн сүбэ мунньаҕы түмүктээтэ.

Мэҥэ Хаҥалас улууһун дьаһалтатын пресс-сулууспата