КҮҺҮҤҤҮ КУСКА КӨҤҮЛ УОННА САҤА УЛАРЫЙЫЫЛАР

Күһүҥҥү киһи күлбүтүнэн дииллэр. Сир аһа, оҕуруот аһа ситиитин тэҥэ көтөр-сүүрэр эмиэ ситэр-хотор, төлөһүйэр кэмэ үүнэр. Саха киһитэ барахсан от үлэтэ улахана бүтэн, тыын ыла түһэн үйэлэртэн илдьэ кэлбит төрүт үгэһин тутуһан күһүҥҥү куска тахсар.

Атырдьах ыйын 15 күнүттэн күһүҥҥү кус көҥүлүн (лиссиэнсийэтин) булчуттарга биэрии саҕаланна. Мэҥэ Хаҥаластааҕы айылҕа харыстабылын иниспиэктэрдэрэ Майа сэлиэнньэтигэр тахсан кус көҥүлүн олохтоохторго биэриигэ көхтөөх үлэни ыыттылар.

Булчут дьон бу күн тоҕуоруһа муһунна. Күн оройугар диэри туох да омуна суох сүүсчэкэ киһи лииссиэнсийэ толоттордо. Булчуттар куска эрэ буолбакка, күһүҥҥү мас көтөрүгэр кытары көҥүл ыллылар.

Быйылгыттан булт сокуонугар кэккэ уларыйыылар киирдилэр. Ол туһунан улуустааҕы айылҕа харыстабылын кэтиир инспекция старшай судаарыстыбаннай иниспиэктэрэ Иннокентий Лаптев сырдатар:
- Күһүҥҥү булт көҥүлүн дьон куһу кытта тэҥэ мас көтөрдөөх ыла сатыыллар. Нарезной сааҕа мас көтөрө күһүн көҥүллэнэр. Онно үс эрэ көрүҥүнэн бултуохха сөп. Тозовка 5,6 уонна 5,7 калибрдаах ботуруоннаах. Итиэннэ Remihgton 223. Онтон саас мас көтөрүгэр карабин илдьэ сылдьар көҥүлэммэт. Доруоп эрэ саанан бултуохха сөп.
Иитиэх куһунан булка уларыйыы баар. Биир куска икки киһи көҥүллэнэр буолла. Болдьоҕо муус устар 25 күнүттэн бэс ыйын 10 күнүгэр диэри уһаата. Ол кэнниттэн тута 20 күн иһигэр ылбыт лиссиэнсийэлэрин төттөрү аҕалан туттарыахтаахтар. Төннөрбөтөх дьон бары Биир кэлим судаарыстыбаннай реестрга киирэллэр, ыстарааптаналлар уонна биир сыл лиссиэнсийэ ылар бырааптарыттан маталлар.

"Эркээйи" хаһыат матырыйаалыттан ылылынна