КЫАЙЫЫ 80 СЫЛЫН КӨРСӨ СЭРИИ СЫЛЛАРЫН ОҔОЛОРУН СҮБЭ МУННЬАҔА ЫЫТЫЛЫННА

КЫАЙЫЫ 80 СЫЛЫН КӨРСӨ СЭРИИ СЫЛЛАРЫН ОҔОЛОРУН СҮБЭ МУННЬАҔА ЫЫТЫЛЫННА

Бүгүн, дойдубут устуоруйатыгар улахан суолталаах күн – Аан дойду иккис уоттаах сэриитэ түмүктэммит күнүгэр Д.Ф. Ходулов аатынан Култуура киинигэр сэрии сылларын оҕолорун мунньан «Сүрэхтэн сүрэххэ» Аҕа дойду сэриитигэр Улуу Кыайыы 80 сылын көрсө ыытыллар тэрээһиннэр тула көрсүһүү тэрилиннэ.

Тэрээһин саҕаланыыта улуус баһылыгын бастакы солбуйааччы Василий Михайлов анал байыаннай дьайыы кыттыылааҕар, Аллараа Бэстээх олохтооҕор, Донбасс куораты көмүскүүргэ кыргыс хонуутугар олоҕун толук уурбут Ярослав Коваленкоҕа анаммыт «Эр санаа уордьана» үрдүк бэлиэни кини ийэтигэр Наталия Георгиевнаҕа, дьиэ кэргэнигэр туттарда.

Сүбэ мунньахха улуус баһылыгын социальнай уонна имиджевэй бэлиитикэҕэ солбуйааччы Альбина Григорьева, Ил Түмэн дьокутааттара Андрей Находкин, Тихон Скрябин, «Сэрии сылларын оҕолоро» өрөспүүбүлүкэтээҕи уопсастыбаннай сэбиэт бэрэссэдээтэлэ Иннокентий Васильев, «Сэрии сылларын оҕолоро» өрөспүүбүлүкэтээҕи уопсастыбаннай сэбиэт бэрэссэдээтэлин солбуйааччы Федора Аммосова, «Сэрии сылларын оҕолоро» улуустааҕы уопсастыбаннай түмсүү салайааччыта Анатолий Чычахов, нэһилиэктэр баһылыктара, сэрии сылларын оҕолоро, уопсастыбанньыктар кыттыыны ыллылар.

Кэпсэтиини улуус бэтэрээннэрин сэбиэтин бэрэссэдээтэлэ Евдокия Решетникова иилээн-саҕалаан ыытта.

Көрсүһүү чэрчитинэн Улуу Кыайыы 80 сылын көрсө улууска бара турар үлэлэри торумнаатылар, сэрии сылларын оҕолоругар болҕомто ууруллара ирдэнэрин кэпсэттилэр, «Кыайыы аартыга» монумен бырайыагын көрдүлэр, санаа атастаһыыта ыытылынна.

Мунньах түмүгүнэн киирбит этиилэр уонна туруорсуулар боротокуолга тиһиллэн үлэҕэ ылыллыахтара.

Мэҥэ Хаҥалас улууһун дьаһалтатын пресс-сулууспата