КЫҺЫН САҔАЛАНАР СЫЫМАХТАН

КЫҺЫН САҔАЛАНАР СЫЫМАХТАН

Бүгүн, ахсынньы 5 күнүгэр, «Кыһын Саха сириттэн саҕаланар» бэстибээл чэрчитинэн

Баатара нэһилиэгэр «Кыһын саҕаланар Сыымахтан» диэн кыһыны көрсүү ураты үөрүүлээх тэрээһинэ ыытылынна.



Оҕо-аймах сылы быһа күүтэр Саҥа дьыл бырааһынньыга чугаһаабытынан олохтоохтору

«Саҥа олох» ХЭТ тэрийээччитэ Тамара Мордасова,

СӨ экспорты өйөөһүҥҥэ уонна инвестицияны тардыыга ааҕыныстыбатын генеральнай дириэктэрэ Анна Стручкова,

улуустааҕы Бизнес-инкубатор салайааччыта Сергей Сергучев,

Баатара нэһилиэгин баһылыга Дмитрий Акимов эҕэрдэлээтилэр.

Тэрээһин чэрчитинэн оҕолорго «Мин тапталлаах Сыымаҕым» диэн тиэмэҕэ уруһуй куонкуруһа,

быыстапкаҕа турбут иистэнньэҥнэр үтүлүктэригэр бастыҥ оһуордаах, тигиилээх үтүлүгү быһаарар куонкурус,

хамаанданан строганина кыһыытыгар күрэх ыытылыннылар. Кыайыылаахтар бары сыаналаах бириистэри тутаннар үөрдүлэр-көттүлэр.

Тэрээһин күүтүүлээх түгэнинэн харыйа уотун уматыы буолла.

Төһө да халлаан тымныытын үрдүнэн, бу кэрэ түгэни көрөөрү, онно быһаччы кыттыыны ылаары кыратыттан улаханыгар тиийэ бары мустубуттар.

Бу үөрүүлээх түгэнинэн олохтоохтору эҕэрдэлии Чысхаан, Хаарчаана, Моруос оҕонньор уонна Снегурочка кэлбиттэр.

Харыйа уотун сандаардан, хороводтаан баран оҕолорго аҕалбыт кэһиилэрин түҥэттилэр.

Олохтоохтор күүппүт күннэриттэн астынан, дуоһуйан туран тэрийээччилэргэ Людмила Валерьевна Николаеваҕа, Анна Александровна Стручковаҕа, Тамара Ивановна Мордасоваҕа саҥа дьыл тыынын бэлэхтээбиттэригэр истиҥ махталларын тиэрдэллэр.

Мэҥэ Хаҥалас улууһун дьаһалтатын пресс-сулууспата