КЫРААЙЫ ҮӨРЭТЭР ТҮМЭЛ САҤАЛЫЫ ТЫЫННАНАН ААНЫН АРЫЙДА

Олунньу 27 күнүгэр судаарыстыбаннай уонна политическай диэйэтэл Роман Гаврильевич Васильев аатын сүгэр улуустааҕы кыраайы үөрэтэр түмэл 60 сылын чэрчитинэн сүрүн саалата саҥардыллан үлэҕэ киириитин бэлиэтээтэ.

Ону тэҥэ, галерея саалатыгар Валериан Васильев хартыыналарын быыстапката турда.

Кыраайы үөрэтэр түмэл 1963 сыл сэтинньи 2 күнүгэр тэриллибит. 2002 сыллаахха саҥа дьиэҕэ киирбит. 2023 сыл бэс ыйыттан хабааннаах өрөмүөн үлэтэ ыытыллан бу күн түмэл аныгы тэтиминэн саҥардыллан бар дьонугар аанын арыйда.

Бу дьоро күнүнэн Саха Өрөспүүбүлүкэтин култууратын уонна духуобунай сайдыытын миниистирэ Афанасий Ноев,

улуус баһылыгын бастакы солбуйааччы Василий Михайлов,

А. Маркова аатынан Дьокуускайдааҕы култуура уонна ускуустуба колледжын дириэктэрэ, Ил Түмэн дьокутаата Захар Никитин,

улуустааҕы култуура уонна духуобунай сайдыы салалтатын салайааччыта Анна Исакова,

Майа сэлиэнньэтин баһылыга Алексей Неустроев,

Арассыыйатааҕы суруналыыстар сойуустарын чилиэнэ, Саха сирин научнай киинин бэтэрээнэ, бэчээт туйгуна, Роман Гаврильевич төрөппүт кыыһа Зинаида Васильева,

уон сыл эҥкилэ суох түмэли салайан кэлбит Зоя Шарина түмэл дириэктэрин Михаил Масаханы, кэлэктииби эҕэрдэлээтилэр, наҕараадалары туттардылар, ситиһиилээх, киэҥ хабааннаах үлэни ыыталларыгар баҕардылар.

Улууспут устуоруйатын кэрэһэлиир кыраайы үөрэтэр түмэл дириэктэрэ Михаил Масаха ыкса үлэлэһэр, күүс-көмө буолар дьонугар махтал суруктарын, ону тэҥэ бу күн үөрүүлэрин үллэстэ кэлбит хас биирдии ыалдьыкка өйдөбүнньүк бэлэхтэрин туттарда.

Мэҥэ Хаҥалас улууһун дьаһалтатын пресс-сулууспата