Ленинград блогадатын кыттыылааҕар Анна Картыненҥа анаммыт киинэ сүрэхтэннэ

Кулун тутар 13 күнүгэр Тараҕай нэһилиэгин Р.А. Бурнашев аатынан Табаҕа орто оскуолатыгар Аҕа дойду Улуу сэриитин уот холоругун ытылҕаныгар түбэспит тыыннааҕар номох буолбут ураты дьылҕалаах учуутал, Ленинград куорат блокадатын кыттыылааҕа, тыыл уонна педагогическай үлэ бэтэрээнэ, Тараҕай нэһилиэгин бочуоттаах олохтооҕо, Мэҥэ Хаҥалас улууһун Бочуот кинигэтигэр киирбит Анна Ивановна Картынен олоҕун сырдатар Сүрэхпитигэр мэлдьи тыыннааххын документальнай киинэ сүрэхтэннэ.

Киинэ улууспутугар үөрэхтээһин тэриллибитэ 150, Ленинград куорат блокадаттан босхоломмута 80 сылларыгар даҕатыллан олоххо киирдэ.

Анна Ивановна 1920 сыллаахха Всеволожскай уобалас Невскай Дубровка бөһүөлэгэр күн сирин көрбүт. Омугунан финка. Сэрии ыар сылларын этинэн-хаанынан билбит, Ленинград блокадатыгар, ол кэнниттэн 1942сыллаахха күүс өттүнэн хоту көһөрүүгэ түбэһэн Саха АССР Жиганскай оройуонугар ссылкаҕа кэлэн балыксытынан үлэлээбит.

Устунан Саха сирин иккис дойду оҥостон биһиги улууспутугар Тараҕай нэһилиэгэр олохсуйан, ыал буолан, оҕо-уруу төрөтөн, оскуолаҕа учууталлаан үгүс элбэх ыччаты үөрэххэ уһуйбута.

Кини чаҕылхай олоҕун туһунан киинэ ааптарынан улуустааҕы бэтэрээннэр сэбиэттэрин бэрэссэдээтэлэ Маргарита Максимова, бэтэрээннэр сэбиэттэрин президиумун чилиэнэ Ульяна Шишигина, улуустааҕы кыраайы үөрэтэр түмэл исписэлииһэ Василий Шарин матырыйааллары тиһэн, таҥан, түбүгүрэн, улахан кээмэйдээх киинэни ситэрэн-хоторон таһаардылар.

Бу кэрэ-бэлиэ түгэнинэн улуус баһылыгын социальнай уонна имиджевэй бэлиитикэҕэ солбуйааччы Альбина Григорьева, сэрии уонна үлэ бэтэрээннэрин өрөспүүбүлүкэтээҕи сэбиэтин бэрэссэдээтэлин солбуйааччы, РФ прокуратуратын бэтэрээнэ Никита Ноев, улуустааҕы үөрэҕирии салалтатын сүрүн исписэлииһэ Николай Тарасов Анна Ивановна Картынен оҕолорун, сиэннэрин, чугас аймах-билэ дьонун ийэлэрин, эбэлэрин сырдык аата үйэтиллибитэн эҕэрдэлээн туран киинэҕэ үлэлэспит дьоҥҥо махтал тылларын эттилэр.

Киинэ улуустааҕы кыраайы үөрэтэр түмэлгэ хараллыаҕа.

Мэҥэ Хаҥалас улууһун дьаһалтатын пресс-сулууспата