Маандай сайылыгар

Атырдьах ыйа. Ылдьыын ааста. Инники Ыспааһап ардахтара. Сир аһа отонтон ураты толору буста. Кус оҕото көтөн, олохтоох көтөр оҕотун улахан күөллэргэ киллэрэн эрэр.

Дьаҥхаады нэһилиэгин төрүт олохтооҕор Миитэрэй Бубякиҥҥа бүгүн үөрүүлээх күн. Куораттан кыыһа Оксана, күтүөтэ Ньукулай оттоһо таҕыстылар. Маандай сайылыгар быйыл от үүнүүтэ өлгөм, бэттиэмэлээх от кытары өрө күөрэйэн таҕыста.

Миитэрэй уонча төбө сылгылаах. Дьөһөгөй оҕолорун кыстатарга элбэх от наада. Күнүс олохтоохтук дьип-дьап курдук тиэхиньикэтин көрүнээт, кырдьаҕас киэһэ сөрүүн түһүүтэ оҕолорун кытта ходуһатыгар киирдэ. Киэһэ үлэлиир үчүгэй, салгыннаах, оҥоойук баар эрээри хамсанар үлэ киһитэ ону билиммэт.

Миитэрэйгэ бүгүн кырачаан сиэттэрэ Ярик уонна Марик көмөлөһө кэллилэр. Кинилэр сайылык оҕолоро, Маандайга сайылаатылар, быйыл бастакы кылааска киирэллэр. Кырачаан көмөлөһөөччүлэр от мунньаллар, Марик оннооҕор бэйэтин холугар холоонноох сүүмэх оту атырдьаҕынан ылан үөһээ ийэтигэр кыдамалыыр. Киһи маннык оҕолору көрөн үөрэр эрэ. Ыал ыччатын кыра эрдэҕиттэн үлэҕэ иитэрэ олус хайҕабыллаах.
Борук-сорукка биир сайыҥҥы күн улахан түбүгэ түмүктэнэр.

Сайылык сүпсүлгэнэ нам барар. Үлэттэн дьолломмут дьиэ кэргэн сыһыы устун аа - дьуо дьиэтин диэки барар.
Сарсын эмиэ элбэҕи эрэннэрэр саҥа үтүө күн үүнүө.

Мэҥэ Хаҥалас улууһун дьаһалтатын пресс-сулууспата