МАЙА СЭЛИЭННЬЭТИГЭР ҮӨРҮҮЛЭЭХ ДЬОРО КҮН ҮҮННЭ

МАЙА СЭЛИЭННЬЭТИГЭР ҮӨРҮҮЛЭЭХ ДЬОРО КҮН ҮҮННЭ

Бүгүн, ахсынньы 28 күнүгэр, Ил Дархан Айсен Сергеевич Николаев үлэ бэрээдэгинэн улууспутугар үлэлээтэ. Сырыытын киэн туттар биир дойдулаахпыт, Баатара нэһилиэгиттэн төрүттээх сахалартан бастакы Сэбиэскэй Сойуус Дьоруойа Федор Кузьмич Попов пааматынньыгар сибэкки дьөрбөтүн ууран сүгүрүйүүттэн саҕалаата.
 
Бу күн Майа сэлиэнньэтигэр "Хаарбах дьиэттэн дьону көһөрүү" бырагырааманан аныгы ирдэбиллэргэ толору эппиэттиир, тыа сиригэр бастакы лииптээх, сэттэ этээстээх, тупсаҕай оҥоһуулаах саҥа таас дьиэ үлэҕэ киирэр үөрүүлээх дьоро күнүгэр Ил Дархан Айсен Сергеевич Николаев бары үтүөнү баҕаран туран олохтоохторго үөрүүлээх быһыыга күлүүстэри туттарда.
Улуус баһылыга Дмитрий Тихонов бүгүҥҥү үөрүүлээх күн үүммүтүнэн саҥа дьиэ олохтоохторугар алаһа дьиэлэрэ сылааһынан туоллун, үгүс үөрүүнү-дьолу аҕаллын, куруук ил-эйэ уйаланнын диэн баҕа санаатын эттэ.

Эбийиэги Николай Святославович Докторов салайааччылаах "Мегинострой" тэрилтэ үлэҕэ киллэрэн Саҥа дьылы саҥа дьиэҕэ көрсөр дьолу билбит 70 дьиэ кэргэн үөрүүлэрэ икки бүк үрдээтэ.

Итиэннэ Майа сэлиэнньэтин мунньахтыыр саалатыгар Айсен Сергеевич Улуу Кыайыы 80 сылын көрсө өрөспүүбүлүкэтээҕи тэрийэр бөлөҕүн мунньаҕын иилээн ыытта.

Майатааҕы Р.Г. Васильев аатынан кыраайы үөрэтэр түмэлгэ сылы түмүктүүр «Ил Дарханныын кэпсэтии» биэрии уһулунна. Ил Түмэҥҥэ дьокутааппыт, биир дойдулаахпыт, "Саха" национальнай көрдөрөр-иһитиннэрэр хампаанньа генеральнай дириэктэрэ Олег Марков биэриини иилээн ыытта.
 
Бу күн биир дойдулаахпыт, Ил Дархан иһинэн үлэлиир туруктаах сайдыы Сэбиэтин чилиэнэ Людмила Николаева улууспут биир бастыҥ үлэлээх “Кэнчээри” оҕону сайыннарар кииҥҥэ итиэннэ СӨ култууратын үтүөлээх үлэһитэ, М.К. Попова аатынан Оҕо ускуустубатын оскуолатыгар оҕолору, кэлэктииби кытта көрсөн үлэ хаамыытын, инники былааннар тула кэпсэттэ.
 
Мэҥэ Хаҥалас улууһун дьаһалтатын пресс-сулууспата