МАЙАҔА ИДЭҺЭ БЫРААҺЫННЬЫГА

МАЙАҔА ИДЭҺЭ БЫРААҺЫННЬЫГА

Бүгүн, сэтинньи 18 күнүгэр, Майа сэлиэнньэтигэр үтүө үгэс буолбут улуустааҕы Идэһэ бырааһынньыгар дьон-сэргэ тоҕуоруһа муһунна, күн-дьыл да туран биэрдэ. Улууспут араас нэһилиэктэриттэн сүөһү, сылгы иитэр хаһаайыстыбаларбыт, биирдиилээн дьоммут кэлэн быыстапка-дьаарбаҥкаҕа кытыннылар.

Ол курдук, атыыга сибиэһэй эт-үүт, үрүҥ ис, муҥха балыга, куурусса, индюк этэ, оҕуруот аһыттан кэнсиэрбэлэр, отон арааһыттан барыанньалар, бэйэ мүөтэ уонна онтон да араас бородууксуйаны аҕалан туруордулар. Олохтоохтор кыстыыр астарын, бэйэ аһын үөрэ-көтө, хото атыыластылар.

Тэрээһин үөрүүлээх арыллыытыгар улууспут баһылыга Дмитрий Тихонов, Майа сэлиэнньэтин баһылыга Алексей Неустроев кэлбит дьоҥҥо эҕэрдэ тылларын тиэртилэр.

"Хороҕор муостааҕы, сыспай сиэллээҕи иитэн, иҥэмтиэлээх, ыраас аһы аһаан олордохпутуна, ыччаппыт чэгиэн туруктаах, үлэбит таһаарыылаах буоларын ситиһиэхпит", - диэн Дмитрий Тихонов бэлиэтиир.

Бүгүҥҥү тэрээһиҥҥэ көхтөөхтүк кыттыбыт, ыарахан үлэлээх туруу үлэһит дьоммутугар итии-истиҥ махтал буолуохтун! Быстыбат быйаҥнаах, уостубат уйгулаах, уҕараабат эрчимнээх, толору дьоллоох буолуҥ!

Өрүү буоларын курдук, "Көрдөөх старт" күрэх дьон болҕомтотун тарта. Түөрт хамаанда хаатыҥканы быраҕыыга, салааскалаах сүүрүүгэ, ханааты тардыһыыга күөн көрүстэ. Түмүккэ Догдоҥо нэһилиэгин хамаандата кыайыылаах тахсан, улуус дьаһалтата туруорбут эт-үүт ас наборунан наҕараадаланна. Иккис миэстэ В.П. Ларионов аатынан Майа орто оскуолатын хамаандата уонна үһүс Үөрэтэр-оҥорон таһаарар киин хамаандата, төрдүс Майатааҕы оҕо искусствотын оскуолатын хамаандата буоллулар. Кинилэр Майа сэлиэнньэтин дьаһалтатын, улуустааҕы тыа хаһаайыстыбатын салалтатын бириистэрин тутан, астынан тарҕастылар.

Мэҥэ Хаҥалас улууһун дьаһалтатын пресс-сулууспата