МАЙАҔА КӨХТӨӨХ УҺУН ҮЙЭЛЭНИИ ӨРӨСПҮҮБҮЛҮКЭТЭЭҔИ ПУОРУМ ЫЫТЫЛЫННА

МАЙАҔА “КӨХТӨӨХ УҺУН ҮЙЭЛЭНИИ” ӨРӨСПҮҮБҮЛҮКЭТЭЭҔИ ПУОРУМ ЫЫТЫЛЫННА

Бүгүн, балаҕан ыйын 30 күнүгэр, Майа сэлиэнньэтигэр Д.Ф. Ходулов аатынан Култуура киинигэр аҕам саастаахтар дэкээдэлэрин чэрчитинэн өрөспүүбүлүкэтээҕи “Көхтөөх уһун үйэлэнии” пуорум ыытылынна.



Бу күн Мэҥэ Хаҥалас, Таатта, Амма, Уус Алдан, Чурапчы уонна Томпо улуустарыттан олоххо көхтөөх, актыыбынай, эдэрдии эрчимнээх 200-тэн тахса бэтэрээн кэлэн кытынна.

Улууспутуттан Хорообут, Төҥүлү, Мөҥүрүөн, Нөөрүктээйи, 2-с Наахара, Ходоро, 1-кы Тыыллыма нэһилиэктэриттэн, Майа сэлиэнньэтиттэн, Аллараа Бэстээх бөһүөлэгиттэн көхтөөх кыттыыны ыллылар.

Күн бастакы аҥарыгар улуус баһылыгын социальнай уонна имиджевэй бэлиитикэҕэ солбуйааччы Альбина Григорьева, Майа сэлиэнньэтин баһылыга Алексей Неустроев, СӨ сэрии уонна үлэ бэтэрээннэрин сэбиэтин бэрэссэдээтэлин солбуйааччы Никита Ноев,

РФ Социальнай пуондатын Саха сиринээҕи салаатын салайааччыта Марина Герман, өрөспүүбүлүкэтээҕи 3№-дээх клиническай балыыһа кылаабынай бырааһа Ольга Татаринова уонна кэлбит ыалдьыттар кыттыылаах төгүрүк остуол тула киэҥ кэпсэтии таҕыста.

Бэтэрээн Сэбиэтин бэрэссэдээтэллэрэ улуустарыгар бэтэрээннэргэ туох үлэ-хамнас ыытылларын сырдаттылар. Кэпсэтии түмүгүнэн бэтэрээннэр санааларын истэн, боппуростарга хоруйдаан баран төгүрүк остуол кыттыылаахтара инники былааннары торумнастылар, этиилэри киллэрдилэр.

Күн иккис аҥарыгар интириэһинэй маастар-кылаастар, Р.Г.Васильев аатынан улуустааҕы Кыраайы үөрэтэр түмэлгэ экскурсия, бэтэрээннэргэ үс бөлөҕүнэн дьиэнэн сылдьыы ыытылынна.

Тэрээһин чэрчитинэн быраастар кэлэннэр баҕалаах дьон саахардарын, дабылыанньаларын мээрэйдээн доруобуйаларын туругун көрдүлэр.

Марина Герман салайааччылаах иккис бөлөх Майа сэлиэнньэтин биир тумус туттар ыалыгар, үлэ бэтэрээннэригэр Светлана, Николай Охлопковтар дьиэ кэргэҥҥэ сылдьан атах тэпсэн олорон ирэ-хоро сэһэргэһэн, санааларын атастастылар.

Пуоруму түмүктүүр үөрүүлээх чааһыгар улуус баһылыгын социальнай уонна имиджевэй бэлиитикэҕэ солбуйааччы Альбина Григорьева Тамара Николаевна Пермяковаҕа «Гражданскай килбиэн» бэлиэни үөрүүлээх быһыыга туттарда. Никита Ноев бастыҥ үлэлээх бэтэрээннэр сэбиэттэригэр наҕараадалары, туоһу суруктары, маастар-кылаас ыыппыт тарбаҕар талааннаах маастардарга махтал суруктары туттарда.

Тэрээһини улууспут талааннаах бэтэрээннэрэ, Майатааҕы үһүс көлүөнэ оскуолата дьон сүргэтин көтөҕөр кэнсиэр көрдөрөн үрдүк таһымҥа түмүктээтилэр.

Мэҥэ Хаҥалас улууһун дьаһалтатын пресс-сулууспата