МАРИЯ ЕГОРОВНА БОРИСОВАҔА АНАММЫТ

МАРИЯ ЕГОРОВНА БОРИСОВАҔА АНАММЫТ

«ДЬОННООХ БУОЛАММЫН» КИНИГЭ ТАҔЫСТА

Тыа хаһаайыстыбатын сайыннарыыга улахан кылааты киллэрбит, үгүс ыччаты үөрэхтээбит, холобур буолар саха Далбар Хотуна, биллиилээх судаарыстыбаннай-бэлитиичэскэй диэйэтэл Семен Захарович Борисов тапталлаах кэргэнэ, элбэх оҕо ийэтэ Мария Егоровна Борисова (Птицына) төрөөбүтэ 100 сылын көрсө, кини сырдык аатыгар анаммыт "Дьонноох буоламмын" кинигэ сүрэхтэнэр бэлиэ тэрээһинэ атырдьах ыйын 17 күнүгэр Мэлдьэхси нэһилиэгэр буолан ааста.

Кинигэҕэ ытыктыыр биир дойдулаахпыт - «Аҕа дойду сэриитигэр 1941-1945 сс. килбиэннээх үлэтин иһин» мэтээл хаһаайына, Социалистическай тыа хаһаайыстыбатын туйгуна, Саха Өрөспүүбүлүкэтин тыатын хаһаайыстыбатын үтүөлээх үлэһитэ, «Гражданскай килбиэн» бэлиэ хаһаайына, 1-кы Тыыллыма нэһилиэгин бочуоттаах олохтооҕо Мария Егоровна тус бэйэтэ өр сылларга суруйбут ахтыылара тиһиллэн оҕо сааһа, олоҕо-дьаһаҕа, үлэтэ-хамнаһа сырдатыллыбыт. Кинигэ 450 ахсаанынан бэчээттэнэн тахсыбыт, улуустааҕы киин бибилэтиэкэ кылаабынай бибилэтиэкэрэ Марина Трифонова кинигэ ис тутулун сиһилии билиһиннэрдэ.

Бэлиэ тэрээһиҥҥэ уруу-хаан дьоно, оскуола саалатыгар тобус-толору түмүстүлэр. Көҕүлээччинэн, кинигэни бэлэмнээбит сүрүннээччинэн Арассыыйа үтүөлээх экэнэмииһэ, улуус бочуоттаах олохтооҕо, Мария Егоровна аймаҕа Владимир Ильич Птицын буолар. Бу күн Москваттан кэлэ сылдьар Мария Егоровна, Семен Захарович уоллара Семен Семенович ыалдьыттаата. Кини төрөппүттэрин туһунан ахтыы оҥордо, сылаас, истиҥ көрсүһүүнэн кэлбит дьоҥҥо махтал тылын эттэ, улуус бибилэтиэкэлэригэр уонна оскуолаларыгар анаан кинигэлэри бэлэх уунна.

Улуус баһылыгын социальнай уонна имиджевэй бэлиитикэҕэ солбуйааччы Альбина Григорьева махтанан туран, Семен Семеновиһинэн сирэйдээн халыҥ аймах дьону кинигэ тахсыбытынан эҕэрдэлээтэ. Ону тэҥэ судаарыстыбаннай-бэлитиичэскэй диэйэтэл Матвей Мучин, 1-кы Тыыллыма нэһилиэгиттэн кыраайы үөрэтээччи Раиса Егорова, улуустааҕы И.М. Сосин аатынан киин бибилэтиэкэ салайааччыта Марианна Никанорова, нэһилиэк баһылыктара Мэлдьэхситтэн Валерий Никифоров, 3-с Мэлдьэхситтэн Мирон Свинобоев, Хорообуттан Гаврил Бродников, 1-кы Тыыллыматтан Руслан Афанасьев, биллиилээх киинэ режиссерэ Иван Кривогорницын, Мария Егоровна аймахтара истиҥ ахтыылары оҥордулар.

Мария Егоровна үтүө аатын үйэтитэр, үлэтин, олоҕун туһунан сырдатар кинигэ ыччаты иитиигэ, кинилэр туруу үлэһит буолан тахсалларыгар тирэх, билиҥҥи үлэһиттэргэ эрэллээх ыйынньык буолуо диэн эрэнэбит.

Мэҥэ Хаҥалас улууһун дьаһалтатын пресс-сулууспата