МАС ТАРДЫҺЫЫ КӨРҮҤЭР КЫАЙЫЫЛААХТАР ААТТАННЫЛАР

МАС ТАРДЫҺЫЫ КӨРҮҤЭР КЫАЙЫЫЛААХТАР ААТТАННЫЛАР

Бүгүн, тохсунньу 25 күнүгэр, Аллараа Бэстээх Т.А. Пинегин аатынан “Парус” спорт уораҕайыгар улуустааҕы комплекснай спартакиада чэрчитинэн мас тардыһыы көрүҥэр биирдиилээн уонна хамаанданан бастыыр иһин чөмпүйэнээт тэриллэн ыытылынна. Чөмпүйэнээт Аҕа дойду сэриитигэр Улуу Кыайыы 80 сылыгар ананна.

Бу күн улууспут 25 нэһилиэгиттэн уопсайа 311 кыттааччы күөн көрсөн тыҥааһыннаах киирсиилэри, чаҕылхай түгэннэри бэлэхтээтилэр. Сүрүн судьуйанан Алексей Попов, сэкирэтээринэн Андриан Захаров үлэлээтилэр.

Күрэх үөрүүлээх арыллыытыгар улуус баһылыгын тутуу боппуруостарыгар солбуйааччы Василий Филиппов, Ил Түмэн дьокутаата Андрей Находкин, мас тардыһыы федерациятын бэрэссэдээтэлэ Иннокентий Яковлев, физическэй култуура уонна спорт салалтатын салайааччыта Алексей Попов кыттааччыларга ситиһиини баҕаран туран улууспут аатын чиэстээхтик ааттатар бастыҥ спортсменнарбытыгар махталларын биллэрдилэр.

Үөрүүлээх түгэҥҥэ Алексей Попов улууспут ыччаттарыгар чөл олоҕу көхтөөхтүк тарҕатар, физическэй култуура уонна спорт сайдыытыгар кылааттарын иһин Дьабыыл нэһилиэгин спорт инструкторыгар Мичил Баишевка итиэннэ спорт уонна физическэй култуура салалтатын сүрүн исписэлииһигэр Галина Аржаковаҕа эҕэрдэлээн туран грамоталары туттарда.

Хамаанданан түмүк:

I бөлөх:
I- Майа сэлиэнньэтэ,
II- Дьаҥхаады нэһилиэгэ,
III- Хаптаҕай нэһилиэгэ.

II бөлөх:
I- Мөҥүрүөн нэһилиэгэ,
II- Мэҥэ нэһилиэгэ,
III- 1-кы Наахара нэһилиэгэ.

III бөлөх:
I- Чыамайыкы нэһилиэгэ,
II- Ороссолуода нэһилиэгэ,
III- Моорук нэһилиэгэ.

Биирдиилээн бастыыр иһин күрэх кыайыылаахтарын ааттара улуус дьаһалтатын сайтыгар тахсыаҕа. Бары кыайыылаахтары эҕэрдэлээн туран инникитин үрдүк ситиһиилэри, чэгиэн-чэбдик туругу, этэҥҥэ буолууну баҕарабыт!

Мэҥэ Хаҥалас улууһун дьаһалтатын пресс-сулууспата