ОЛОҤХО ДЬИЭТИН ҮЛЭҺИТТЭРЭ - КАЗАХСТАҤҤА САХА СИРИН КҮННЭРИГЭР

ОЛОҤХО ДЬИЭТИН ҮЛЭҺИТТЭРЭ - КАЗАХСТАҤҤА САХА СИРИН КҮННЭРИГЭР

Казахстан Өрөспүүбүлүкэтин Алматы куоратыгар ыытыллар Саха сирин күннэрин бырагырааматыгар Амма, Уус Алдан, Нам, Мэҥэ Хаҥалас, Үөһээ Бүлүү, Сунтаар улуустарыттан Олоҥхо дьиэтин үлэһиттэрэ, олоҥхону толорооччулар, оһуокайдьыттар, алгысчыттар, норуот маастардара кытталлар.

Муус устар 21 күнүгэр Алматы куоракка Ыхлас аатынан муусука үнүстүрүмүөннэрин түмэлигэр «Аан дойду эпостара Казахстаҥҥа» көрсүһүүлэрэ ыытылынна. Көрсүһүүнү Спиридон Григорьев - Илгэлээх Испиридиэн алгыһынан аста. Саха норуотун тылынан баайын олоҥхону олоҕурбут ньыманан Мэҥэ Хаҥалас улууһуттан Аксиния Степанова, Станислав Иванов, Сунтаартан Туяра Алексеева, Амматтан Анна Кириллина, Игорь Болтунов, Намтан Владимир Сыромятников толордулар, ону тэҥэ Казахстан манасчылара кыттыннылар.

Көрсүһүүнү Айта Васильева, Спиридон Григорьев иилээн-саҕалаан ыыттылар. Эҕэрдэ тыллары Ил Түмэн Судаарыстыбаннай Мунньаҕын бэрэсэдээтэлин солбуйааччы, Олоҥхо национальнай кэмитиэтин бэрэссэдээтэлэ Александр Николаевич Жирков, култуура уонна духовнай сайдыы миниистирэ Афанасий Иванович Ноев, Ыхлас аатынан муусука норуодунай үнүстүрүмүөннэрин түмэлин салайааччыта Джанибек Баурджан Узбекалиевич эттилэр.

Улуустааҕы Гавриил Колесов аатынан Олоҥхо дьиэтин салайааччыта Евдокия Николаевна Иванова бииргэ алтыһан үлэлиир, эпостары дириҥник үөрэтэр, ырытар ытыктыыр учуонайга Аль Фараби аатынан Казахскай национальнай университет профессорыгар, Шынгыс Айтматов дойдулар икки ардыларынааҕы академия академигар, филологическай наука докторыгар Анарбай Саиуглы Булдыбайга өйдөбүнньүк суруктаах чороону туттарда.

Анарбай Саиуглы 1982 сыллаахха биир дойдулаахпыт Гавриил Колесов бэлэхтээбит «Дьулуруйар Ньургун Боотур» олоҥхо пластинкатын уонна хаартыскалары А.И. Ноевка, Е.Н. Ивановаҕа туттарда. Истиҥ көрсүһүү, үтүө доҕордоһуу киэһэтэ оһуокайынан түмүктэннэ.