ӨРӨСПҮҮБҮЛҮКЭТЭЭҔИ СЫЛГЫҺЫТ КҮНЭ МЭҤЭ ХАҤАЛАС УЛУУҺУГАР САҔАЛАННА

ӨРӨСПҮҮБҮЛҮКЭТЭЭҔИ СЫЛГЫҺЫТ КҮНЭ МЭҤЭ ХАҤАЛАС УЛУУҺУГАР САҔАЛАННА

Бүгүн, кулун тутар 21 күнүгэр, улууспутугар өрөспүүбүлүкэбит араас муннугуттан төрүт үгэспитин харыстаан илдьэ сылдьар, сайыннарар, сылгыны иитиигэ олохторун анаабыт, бэриниилээхтик үлэлии-хамсыы сылдьар үлэһит дьон түмүстэ.

Саха Өрөспүүбүлүкэтигэр Сылгыһыт күнүн иитинэн Социалистическай Үлэ Дьоруойа А.Е. Степанов олоҕун-дьаһаҕын, үлэтин сырдатар итиэннэ сылгыга аналлаах норуот айымньытынан быыстапкалар, А.Е. Степанов үтүө аатыгар сүгүрүйэн пааматынньыгар сибэкки дьөрбөтүн ууруу сиэрэ-туома, сылгы иитиитин тула сүбэ мунньах ыытылыннылар.

Майа сэлиэнньэтин Д.Ф. Ходулов аатынан Култуура киинигэр сахалартан маҥнайгы Социалистическай Үлэ Дьоруойа, аатырбыт сылгыһыт Афанасий Егорович Степанов төрөөбүтэ 105, Улуу Кыайыы 80, Уһук Илиҥҥи уокурук төрүттэммитэ 25 сылларыгар анаммыт “Сылгыһыт күнэ” өрөспүүбүлүкэтээҕи тэрээһин өрө көтөҕүллүүлээхтик барда.

Ыраахтан-чугастан кэлбит идэлээх дьону Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Сергей Местников, улуус баһылыга Дмитрий Тихонов, СӨ Ил Түмэн Судаарыстыбаннай Мунньаҕын тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласов, Сир
сыһыаннаһыыларыгар, айылҕа баайыгар уонна экологияҕа
сис кэмитиэтин бэрэссэдээтэлэ Андрей Находкин, СӨ тыа хаһаайыстыбатын уонна ас-үөл бэлиитикэтин миниистирии бастакы солбуйааччы Анна Стручкова эҕэрдэлээтилэр, тыа хаһаайыстыбатын сайдыытыгар улахан кылааттаах дьоҥҥо өр сыллаах, үтүө суобастаах үлэлэрин иһин наҕараадалары туттардылар.

Тэрээһин иккис аҥаарыгар Саха Өрөспүүбүлүкэтигэр Сылгыһыт күнүгэр аналлаах тэрээһиннэри түмүктүүр быһаарыылаах сүбэ мунньах буолла.
Мунньахха 300 кэриҥэ киһи кыттыыны ылла. Өбүгэлэрбититтэн ыла илдьэ кэлбит сыспай сиэллээҕи иитии, баар кыһалҕаларга болҕомто туһуланарыгар, сылгы ахсаанын дэлэтии, бу идэни сайыннарыы туһунан бэрт дириҥ суолталаах кэпсэтии таҕыста.

Ол курдук, биэ төбөтүгэр бэриллэр субсидия, социальнай хантыраак быһыытынан көмө көрүллүүтүн тэрийиини, сааскы өртөөһүнү сөргүтүүнү, сири төрдүттэн тупсаран оҥоруу үлэтин, племенной үлэ, эти батарыы, төрүөх ахсаанын улаатыннарыы, тыа хаһаайыстыбатын үөрэҕин кыһаларыгар үөрэхтээһин, оҕону кыра сааһыттан бу эйгэҕэ сыһыарыы, онтон да атын боппуруостар тула санаалар этилиннилэр. Саха сылгыта сайыннын, кэскилэ кэҥээтин, сыһыы аайы сыспай сиэллээх сырыырҕаатын диэн баҕа санааны этэн, мунньах сэттэ пууннаах резолюция ылыныынан түмүктэннэ.

Сарсын Хара нэһилиэгэр Куоҥ Харах сиригэр-уотугар үгэскэ кубулуйбут сыллата ыытыллар "Сылгыһыт күрэҕэ" буолуоҕа. Бастыҥ хамаанданы быһаарар, күүстэрин-уохтарын тэҥниир, илин-кэлин түсүһүүлээх, тыҥааһыннаах күөн күрэһи кэлэн көрүҥ, дьоммутугар ыалдьыҥ диэн бука барыгытын ыҥырабыт.

Сылгыһыт үлэтин өрө туппут тыа хаһаайыстыбатын ытыктабыллаах бэтэрээннэрин, билигин үлэлии-хамсыы сылдьар сылгыһыттары бүгүҥҥү бэлиэ күҥҥүтүнэн итиитик-истиҥник эҕэрдэлиибит, уйгулаах быйаҥ олоҕу, үрдүк ситиһиилэри, этэҥҥэ буолууну баҕарабыт! Сылгыһыт күрэҕэр ким ордук бэлэмнээх, дьулуурдаах хамаанда - ол кыайдын!

Бүгүҥҥү тэрээһиннэртэн хаартыскалары бу сигэнэн киирэн көрүҥ️️️:

https://drive.google.com/drive/folders/11CCRRxNszGdKStOVegTfi0dUfSYgbcWG?usp=sharing

Мэҥэ Хаҥалас улууһун дьаһалтатын пресс-сулууспата