ӨРӨСПҮҮБҮЛҮКЭТЭЭҔИ СЫЛГЫҺЫТ КҮРЭҔИН КЫАЙЫЫЛААХТАРА ААТТАННЫЛАР

ӨРӨСПҮҮБҮЛҮКЭТЭЭҔИ СЫЛГЫҺЫТ КҮРЭҔИН КЫАЙЫЫЛААХТАРА ААТТАННЫЛАР
 
Бүгүн, кулун тутар 22 күнүгэр, Хара нэһилиэгин Куоҥ Харах ипподромугар улууспут дьоно-сэргэтэ, ыалдьыттара өрөспүүбүлүкэтээҕи Сылгыһыт күрэҕэр түмүстүлэр.
 
Тэрээһин үөрүүлээх арыллыыта күрэх кыттааччылара итиэннэ улууспут уран тарбахтаах, талба талааннаах дьоно-сэргэтэ өбүгэлэрбит мааны мандардаах, эҥин эгэлгэ таҥастарын тиктэн, киэргэллэрин иилинэн сэлэлээн хаамыыларыттан саҕаланна. Параады улууспутугар ат спордун федерациятын салайааччыта Аркадий Лукин иилээн киллэрдэ. Өбүгэлэрбит үтүө үгэстэрин тутуһан Дьөһөгөй оҕотугар анаан-минээн Виталий Очиров-Алгыс Ачыырап алгыһы көтөхтө.
 
СӨ Тыа хаһаайыстыбатын уонна ас-үөл бэлиитикэтин миниистирэ Артем Александров, улуус баһылыга Дмитрий Тихонов,СӨ Ил Түмэн Судаарыстыбаннай мунньаҕын тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласов, Сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Андрей Находкин төрүт үгэспитин көҕүлүүр, тыабыт сирэ салгыы сайдарын туһугар үлэлии-хамсыы сылдьар бары сылгыһыттары, мустубут бар дьону бүгүҥҥү бэлиэ күнүнэн эҕэрдэлээн туран күрэхтэһээччилэргэ ситиһиилэри баҕардылар.

Күрэххэ Ньурба, Үөһээ Бүлүү, Таатта, Өлүөхүмэ, Үөһээ Дьааҥы, Горнай, Хаҥалас, Бүлүү, Уус Алдан, Амма, Мэҥэ Хаҥалас, Нам, Чурапчы улуустарыттан уопсайа 19 хамаанда илин-кэлин түсүһэн бастыҥнары быһаардылар.
 
Өрөспүүбүлүкэтээҕи Сылгыһыт күрэҕин түмүгэ:
 
I – Амма улууһун "Бөтүҥ" хаһаайыстыбата, хамандыыр Артур Яковлев.
II – Мэҥэ Хаҥалас улууһун 1-кы Наахара нэһилиэгэ, хамандыыр Егор Федоров.
III – Амма улууһун "Давидофф" тэрилтэтэ, хамандыыр Анатолий Баишев.
 
Муҥутуур кыайыылаахтар тыа хаһаайыстыбатын тиэхиньикэтин атыылаһыыга 2,5 мөлүөйүөн солкуобайдаах туоһу суругунан, иккис миэстэлээх хамаанда бортовой УАЗ массыынанан уонна үһүс бочуоттаах миэстэҕэ тахсыбыт хамаанда буран атыылаһарга туоһу суругу туттулар.
 
Ону тэҥэ Уус Алдан улууһуттан сылдьар Владимир Музофаров “Эдэр кыттааччы”анал аан хаһаайына буолан ыҥыырынан итиэннэ биир дойдулаахпыт Иван Кычкин “Аҕам саастаах кыттааччы” ааты ылан 30 тыһыынча солкуобайынан наҕараадаланнылар.

Социалистическай Үлэ Дьоруойа Афанасий Егорович Степанов төрөөбүтэ 105, Улуу Кыайыы 80, Уһук Илиҥҥи уокурук төрүттэммитэ 25 сылыгар анаммыт “Сылгыһыт күнэ өрөспүүбүлүкэтээҕи тэрээһин икки күн устата Сахабыт сирин араас муннугуттан үгүс киһини муһан өрө көтөҕүллүүлээхтик, тэрээһиннээхтик ыытылынна. Күрэх кыайыылаахтарыгар итии-истиҥ эҕэрдэбитин тиэрдэбит! Бары кыттааччыларга үлэҕит-хамнаскыт таһаарыылаах, ситиһиилээх буоларыгар баҕарабыт!
 
Күрэх түгэннэриттэн хаартыскалары бу сигэнэн киирэн көрүҥ️️️:

https://drive.google.com/drive/folders/1mFBGLpRGiBLBn1GVM5VtWzE0h_4sQZC7?usp=sharing

Мэҥэ Хаҥалас улууһун дьаһалтатын пресс-сулууспата