ОРОССОЛУОДАЛАР КУЛУУП ТУТУЛЛУУТУН КӨҺҮТЭ КҮҮТЭЛЛЭР

ОРОССОЛУОДАЛАР КУЛУУП ТУТУЛЛУУТУН КӨҺҮТЭ КҮҮТЭЛЛЭР

СӨ гражданскай көмүскэллээх буолуу уонна нэһилиэнньэ олоҕо-дьаһаҕа куттала суох буолуутун миниистирин солбуйааччы Никита Павлов салайааччылаах үһүс бөлөх күн иккис аҥаарыгар Ороссолуодаҕа үлэлээтэ.



Илья Макаров баһылыктаах Ороссолуода нэһилиэгэр 45 олохтоох оскуола аактабай саалатын толору гына олорон өрөспүүбүлүкэ ситэриилээх былааһын ааспыт сыллааҕы үлэтин отчуотун иһиттэ, аһаҕас кэпсэтиигэ кыттыста.

Отчуоту иһитиннэрии кэнниттэн Никита Александрович Ороссолуода орто оскуолатын нуучча тылын уонна литературатын учууталыгар Валентина Афанасьевна Стручковаҕа үөрэхтээһин систиэмэтэ сайдыытыгар киллэрбит кылаатын уонна үтүө суобастаах үлэтин иһин СӨ Үөрэҕирии уонна билим министиэристибэтин бочуоттаах грамотатын туттарда, ол кэнниттэн тута боппуруостары, этиилэри истиигэ киирдилэр.

Нэһилиэнньэ өрүһү туоруур муоста тула олохтоохтору кытта көрсөн бырайыагы билиһиннэрии тэриллиитин, култуура уонна спорт киинин тутуллуутун чааһынай дьиэлээхтэргэ «Хаарбах дьиэттэн дьону көһөрүү» курдук бырагырааманы олохтооһуну, элбэх кыбартыыралаах таас дьиэ тутуллуутун, өрүһү туоруур кыһыҥҥы суолу тупсарыыны сытыытык туруорустулар.

Ону тэҥэ,

⁃ гаражтарга ОДьКХ төлөбүрүн тарыыба тоҕо нэһилиэк нэһилиэк аайы атынын, манна субсидия көрүллүүтүн,

⁃ өрүһү туоруур муоста тутуллуутугар сир алдьаныытын утары туох үлэ барарын,

⁃ муостанан туоруурга төлөнөр төлөбүрү,

⁃ гаас ситимин утаҕа тардыллыыта кыалларын,

⁃ оҕо төрөөһүнүн, нэһилиэнньэ ахсаанын,

⁃ Дьокуускай куоракка Поярков аатынан уулусса аата тоҕо уларыйбатын,

⁃ Чыамайыкыга алмаас таас хостооһунун,

⁃ дьиэ туттуутугар көрүллэр субсидия

туһунан туоһуластылар.

Өрүһү туоратар муоста туһунан киирбит ыйытыыларга СӨ Транспорт уонна суол-иис хаһаайыстыбатын министиэристибэтин уу уонна тимир суол транспорын департаменын кылаабынай исписэлииһэ Владимир Новиков хоруйдаата, билиҥҥи туругунан туоруурга төлөбүр баара, суоҕа биллибэт диэн иһитиннэрдэ.

Эбии этии быһыытынан сүөһү ахсаанын элбэтиигэ 10-20 төбөҕө ананар каркаснай хотоннору бырайыактаан айан, оҥорон таһааран нэһилиэнньэҕэ тарҕатыыны,

эт сыанатын хонтуруоллааһыны киллэрдилэр.

Нэһилиэк баһылыга Илья Макаров олохтоохтор боппуруостарын бигэргэтэн, салалта үлэтин үчүгэйинэн сыаналаан туран туруорсуулар боротокуолларын бөлөх салайааччытыгар Никита Павловка туттарда.

Мэҥэ Хаҥалас улууһун дьаһалтатын пресс-сулууспата