ОРОССОЛУОДАЛАР ТУРУОРСУУЛАРЫН ХОТО БИЭРДИЛЭР

ОРОССОЛУОДАЛАР ТУРУОРСУУЛАРЫН ХОТО БИЭРДИЛЭР

Бүгүн, тохсунньу 31 күнүгэр, улуус баһылыга Дмитрий Тихонов салайааччылаах, Томмоттооҕу уокуруктан Ил Түмэн дьокутааттара Олег Марков, Тихон Скрябин, оройуон дьокутааттарын Сэбиэтин бэрэссэдээтэлэ Иннокентий Андросов, улуустааҕы мунньах дьокутаата Михаил Масаха, тустаах тэрилтэлэр, салалталар салайааччылара, эппиэттээх үлэһиттэрэ састааптаах отчуоттуур бөлөх салалта сыллааҕы үлэтин Ороссолуода нэһилиэгэр 41 олохтооххо сырдатта.

Илья Макаров баһылыктаах Ороссолуода нэһилиэгэр бу сыл тохсунньу 1 күнүн көрдөрүүтүнэн перепись түмүгүнэн 474 киһи, олорорунан 331 киһи баара бэлиэтэнэр.

Олохтоохтор

⁃ улууска ыытыллар тутуу хаачыстыбатын,

⁃ быраастар тиийбэттэрин,

⁃ кэлии омуктар ахсааннарын,

⁃ атыыланар табаар хаачыстыбатын бэрэбиэркэни,

⁃ улахан уу кэлиитигэр ылыллар миэрэлэри,

⁃ өрүһү туоруур муоста тутуутугар оттуур бааһына киртийдэҕинэ саҥа сир бэриллэр дуо диэн туоһуластылар.

Уот линиятыгар хапытаалынай өрөмүөнү ыытыыны, оҕуруот харайар сир оҥоһуллуутун, кулууп тутуллуутун, интернет кыамтатын улаатыннарыыны, убаҕас бытовой отходу тоҕор анал сир ирдэнэрин, Аллараа Бэстээх - Ороссолуода маршрутнай автобус сырыытын курдук сытыы туруорсууларын хото биэрдилэр.

Ону тэҥэ улууска биллэриллибит Тыа хаһаайыстыбатын сылларынан олохтоммут баһылык гранын ылары ситиспит Дьабыыл нэһилиэгиттэн Лариса Иванова көтөр ферматын хаһаайыстыбатын интэриэһиргээн ыйыттылар.

Мустубут дьон улууспут бастакы оскуолатын бэйэтэ үбүлээн туттарбыт, үөрэхтээһини төрүттээбит

Бочуоттаах инородец, меценат,

Илин Хаҥалас улууһун Инороднай быраабатын кулубата Герасим Иванович Соловьев уонна кини удьуорун туһунан икки кинигэлээх дьоһун кинигэ сүрэхтэниитигэр улуус өттүттэн үбүлээһин көрүллүбүтүн, улахан үлэ ыытыллыбытын иһин баһылыкка Дмитрий Ивановичка махтаннылар.

Ону тэҥэ, Герасим Иванович уҥуоҕун уу ылар куттала баарынан миэстэтин көһөрөр баҕалаахтарын биллэрдилэр.

Мэҥэ Хаҥалас улууһун дьаһалтатын пресс-сулууспата