ОТЧУОТ ИККИС КҮНЭ 1-КЫ НААХАРА НЭҺИЛИЭГИТТЭН САҔАЛАННА

ОТЧУОТ ИККИС КҮНЭ 1-КЫ НААХАРА НЭҺИЛИЭГИТТЭН САҔАЛАННА

 

Бүгүн, ахсынньы 11 күнүгэр, улуус баһылыга Дмитрий Тихонов салайааччылаах сыллааҕы үлэни отчуоттуур бөлөх отчуот иккис күнүн 1-кы Наахара нэһилиэгэр саҕалаата. Уопсайа 69 олохтоох кэлэн иһиттэ, долгутар боппуруостарын ыйытта, туруорсууларын киллэрдэ. Бу күн тэрилтэлэр, салалталар салайааччылара, солбуйааччылара нэһилиэнньэттэн киирбит боппуруостарга хоруйдары, сүбэлэри биэрдилэр.

 

Улуус баһылыга Дмитрий Тихонов 2024 сылга ыытыллыбыт үлэни-хамнаһы слайданан көрдөрөн отчуоту сиһилии сырдатта. Отчуот хаамыытынан нэһилиэнньэттэн араас хайысханан боппуруостар киирдилэр. Ол курдук, сүрүннээн суолу оҥоруу боппуруостара, саҥа тутуулары хаачыстыбатын бэрэбиэркэлээһин, бэйдиэ сылдьар ыттарга туох миэрэлэр баалларын, тыа хаһаайыстыбатын эйгэтигэр үүт харчыта тоҕо үрдүүрүн, быраастарынан хааччыллыыга туох үлэ ыытылларын, “Спорт Манчаары дойдутугар” кинигэҕэ саҥа маастардары киллэрэн саҥа кинигэ тахсыытын, бэтэринээрдэр хаан аналиһын сыаната үрдүү турарынан аналиһы сылга биирдэ ылаллара кыаллыан сөп дуо диэн ыйыттылар.

Нэһилиэнньэ туруорсар боппуруостарынан сүрүннээн спорт саалата тутуллуута, такси сыаната үрдүгүнэн автобус сырыыта олохтонуон, дамба тутуллуон наадатын, Аллараа Бэстээх бөһүөлэгэр элбэх оҕолоох дьоҥҥо бэриллибит уһаайбаларга суол, уот үлэтэ көдьүүстээхтих барыан наадатын эттилэр.

 

Нэһилиэк дьаһалтата, мустубут бар дьон түргэн, күүстээх сибээһи холботторорго кыах биэрэр федеральнай бырагыраамаҕа киирбиттэригэр улуус дьаһалтатыгар, улууспут олохтоохторугар бука бары түмсэн куоластарын биэрбиттэригэр махталларын биллэрдилэр. Быйылгы отчуот хаамыыта уратытык барбытын, олох бары эйгэтинэн ыытыллыбыт үлэ-хамнас слайдаҕа сиһилии сырдатыллыбытын мустубут дьон биһирээбиттэрин эттилэр.

 

Ил Түмэҥҥэ улууспут дьокутаата Андрей Находкин дойдубут таһымыгар киириэхтээх олохтоох бэйэни салайыныыга туһуламмыт “КлиКра” сокуон барылын туһунан дьоҥҥо-сэргэҕэ билиһиннэрдэ.

 

Улуустааҕы кыраайы үөрэтэр түмэл салайааччыта, улуус дьокутаата Михаил Масаха отчуот хаамыытынан сүрүннээн тыа хаһаайыстыбатын эйгэтигэр, айылҕа харыстабылыгар, киирбит боппуруостарга, туруорсууларга бэйэтин тус санаатын, үлэлэһэ сылдьар үлэтин сырдатта.  

 

Түмүккэ баһылык Дмитрий Тихонов былыырыҥҥы отчуот түмүгүнэн ыытыллыбыт үлэни сырдатта, анал байыаннай дьайыыга сылдьар биир дойдулаахтарбытыгар ыытыллар көмөҕө нэһилиэк олохтоохторо бары ыытыллар үлэҕэ көхтөөхтүк кытталларын иһин махталын эттэ.

 

Мэҥэ Хаҥалас улууһун дьаһалтатын пресс-сулууспата