САҤА ГААС ХОЧУОЛУНАЙДАР ҮЛЭҔЭ КИИРДИЛЭР

САҤА ГААС ХОЧУОЛУНАЙДАР ҮЛЭҔЭ КИИРДИЛЭР

Кулун тутар 11 күнүгэр

Догдоҥо уонна Моорук нэһилиэктэригэр саҥа гаас хочуолунайдар үлэҕэ киириилэрэ үөрүүлээх быһыыга-майгыга бэлиэтэннэ.



Ол курдук, Бөкөҕө Роман Морозов начаалынньыктаах, 1,5 МВт кыамталаах блочнай-модульнай хочуолунай уонна

Моорук нэһилиэгэр Еремей Жирков маастардаах, 1,2 МВт кыамталаах хочуолунай аалай лиэнтэлэрин быстылар.

Хочуолунайдар иккиэн үстүү оһохтоохтор, мантан иккитэ үлэлиир, биирэ резевнэй буолар. Социальнай эбийиэктэр уонна чугас сытар чааһынай дьиэлэр сылытыллаллар.

Быйылгы кыстык томороон тымныыларын икки хочуолунан этэҥҥэ туораабыттар.

Үлэһиттэр давлениены, уу барыытын, уоту-күөһү көрөллөр. Уот барар түгэнигэр резевнэй электро-энергия холбонон хочуолунай циркуляцията тохтообот.

Бу үөрүүлээх күҥҥэ улуус баһылыга Дмитрий Тихонов, Саха Өрөспүүбүлүкэтин олох-дьаһах коммунальнай хаһаайыстыба генеральнай дириэктэрэ, Ил Түмэн дьокутаата Виталий Чикачев,

«СӨ ОДьКХ» СУТ Тутуллар эбийиэктэр дириэксийэтин дириэктэрэ Михаил Соловьев, «СӨ ОДьКХ» СУТ Мэҥэ Хаҥаластааҕы филиалын салайааччыта Иннокентий Яковлев олохтоохтору уонна үлэһиттэри эҕэрдэлээтилэр.

Улууспут үрдүнэн олох-дьаһах коммунальнай хаһаайыстыба билиитигэр уопсайа алта уон биир хочуолунай баарыттан түөрт уона гааһынан, сүүрбэ биирэ чоҕунан оттуллан үлэлии тураллар. Тэрилтэ ситимигэр 404 социальнай эбийиэк, 1400-чэ чааһынай ыаллар холбонон олороллор.

Быйылгы дьылга эбии Дойду нэһилиэгэр саҥа чох хочуолунай үлэҕэ киирэрэ уонна Мэҥэ нэһилиэгэр хочуолунайы кэҥэтэн кыамтатын улаатыннарыы былааннанар.

Мэҥэ Хаҥалас улууһун дьаһалтатын пресс-сулууспата