Саҥа үөрэх дьылын көрсө

Бүгүн Арассыыйаҕа Уһуйааччы уонна Аҕа сүбэһит сылыгар анаммыт Билии күнэ биһиги улууспутугар киэҥ далааһыннаахтык ыытылынна.

Оскуола боруогун быйыл саҥа атыллыыр 592 кырачаан үөрэнээччилэрбит сырдыкка-кэрэҕэ сирдиир бастакы учууталларын кытта маҥнайгы чуорааннарын чугдаара тыаһаттылар.

Улуус баһылыга Дмитрий Тихонов,
баһылыгы бастакы солбуйааччы Василий Михайлов, социальнай уонна имиджевэй бэлиитикэҕэ солбуйааччы Альбина Григорьева, тутуу боппуруостарыгар солбуйааччы Василий Филиппов,
салалталар салайааччылара, дьаһалта үлэһиттэрэ улуус бары 36 оскуолаларыгар,
үөрэх кыһаларыгар Билии күнүнэн оҕолору, учууталлары, төрөппүттэри уонна бэтэрээннэри эҕэрдэлээтилэр.

Быйыл оскуола боруогун маҥнайгытын атыллыыр кырачааннарга Ил Дархан Айсен Николаев аатыттан үөрэнээччи күннүгүн итиэннэ улуус аатыттан үөрэнэр кэмпилиэктэри бэлэхтээтилэр.

Бу үөрэх дьылыгар саҥа сүүрээнинэн М.Е. Попов аатынан Аллараа Бэстээх орто оскуолатыгар тимир суол идэлэригэр ананар транспортнай техникум кылааһа, В.П. Ларионов аатынан Майа орто оскуолатыгар уонна Төҥүлү орто оскуолатыгар медицинскэй кылаастар арыллыылара буолар.
Маннык анал идэҕэ туһаайыллыбыт кылаастар үөрэнээччилэрэ инники идэлэрин талалларыгар, олохторугар сыаллаах, сайдыылаах, киэҥ билиилээх дьон буолан тахсалларыгар олук буолаллар.

Бүгүҥҥү күнтэн Аныгы кэм оскуолата федеральнай бырагыраама чэрчитинэн
В.П. Ларионов аатынан Майа оскуолатыгар, Аллараа Бэстээх 2-с нүөмэрдээх оскуолатыгар,
1-кы Баатара, 1-кы Наахара, Нөөрүктээйи, Моорук нэһилиэктэрин оскуолаларын истэринэн Точка роста диэн естественнэй-научнай уонна технологическай хайысхалаах үөрэҕирии кииннэрэ арылыннылар.

Манна эбии үөрэхтээһини таһынан физика, биология уонна химия предметтэрин дириҥэтэн үөрэтиэхтэрэ, саҥа материальнай-техническэй база тэрийэн,
онтон тирэхтэнэн бүтүн улуус оҕолорун дьарыктыыр, сайыннарар дьоһун сыал-сорук уһуйааччылар иннилэригэр турда.

Үөрэх, билии киһиэхэ сүдү баай, үүнүүгэ-сайдыыга олук, тирэх буолар.
Саҥа үөрэх дьылыгар барыгытыгар үтүмэн арыйыылары, үрдүк чыпчааллары, таһаарылаах үлэни, үөрэҕи баҕарабыт!

Мэҥэ Хаҥалас улууһун дьаһалтатын пресс-сулууспата